Abaev shetelde tilshiler qosyndaryn ashýdy qoldaıdy

ASTANA. QazAqparat - Búgin Qazaqstannyń strategııalyq zertteýler ınstıtýtynyń uıymdastyrýymen ótken sarapshylar kezdesýinde otandyq buqaralyq aqparat quraldarynyń sheteldegi tilshiler qosyndaryn ashý máselesi kóterildi. QR Aqparat jáne kommýnıkatsııalar mınıstri atalǵan bastamany qoldaıtynyn jetkizdi, dep xabarlaıdy QazAqparat tilshisi.

Kezdesýdiń moderatory, saıasattanýshy Erlan Qarın shetelge barǵanda «QazAqparat» Halyqaralyq aqparat agenttigi men «Habar 24» arnasyna tıesili tilshiler qosyndarynyń jumys istep turǵanyn jetkizip: «Atalǵan bólimsheler Qazaqstannyń ǵana emes, jalpy Ortalyq Azııanyń jalǵyz ókilderi eken. Demek, qazaqstandyq buqaralyq aqparat quraldary tutas aımaq úshin jalǵyz aqparat kózi bolyp sanalady», - dedi E.Qarın.

Mınıstr Abaev óz kezeginde tilshiler qosyndaryn ashýdy qoldaıtynyn jetkizdi. «Menińshe, tilshiler qosyndary qajet. Ásirese, Reseı, Qytaı, AQSh sııaqty elderde, sondaı-aq Ortalyq Azııa men Eýropaǵa kiretin negizgi áriptes memleketterde ashý qajet. Osy saladaǵy jumys jalǵasa beredi. Árıne, bunyń barlyǵy aqparat salasyndaǵy memlekettik tapsyrysqa baılanysty. Máselen, jeke menshik telearnalar men aqparattyq agenttikter shetelde óz tilshilerin ustaı almaıdy. Sebebi oǵan da qyrýar qarjy qajet», - dedi mınıstr.