Abaev memlekettik tilge qatysty synǵa jaýap berdi

ASTANA. QazAqparat - QR Aqparat jáne kommýnıkatsııalar mınıstrliginiń búgingi keńeıtilgen alqa májilisinde «Shalqar» radıosynyń jýrnalısi Temirxan Mombekuly mınıstrge memlekettik til máselesine qatysty suraq qoıdy, dep habarlaıdy QazAqparat tilshisi.

Óz sózinde ol keńester kezindegi qazaq tildi basylymdardy ashýdyń mashaqatyn eske alyp, aqparat salasyndaǵy tildik saıasat problemasyn qozǵady. Mınıstr Abaev osy máselege qatysty óz ustanymy bildirdi.

«Ol kúrdeli másele ekenin bárimiz jaqsy bilemiz. Ekrandaǵy mátin nege qazaqsha jazylmaıdy, baıandamany nege shet tilde jasaıdy dep aıtyp jatyrsyz. Eń aldymen Qazaqstannyń egemen el bolǵanyna táýba etý kerek. Bizde bári aman-esen, tynysh. Qazaqtyń sany kóbeıip keledi. Balalardyń 90 paıyzdan astamy qazaq tildi mektepterge baryp jatyr. Soǵan táýba etý kerek. Jańa Petropavldyń atyn aýystyrý týraly aıtyp otyrsyz. Eger siz dál qazir sol jaqqa baryp, bárimen jaǵalasyp, shý shyǵarsańyz, onyń sońy ne bolady? Qalanyń ataýyn aýystyrasyz, biraq sol jerde júrgen adamdardyń bárin qazaq qyla almaısyz ǵoı. Osy nárseni túsiný kerek», - dedi Abaev.

Mınıstrdiń aıtýynsha, qazaqtyń birneshe tilde sóıleı alatynyna maqtaný qajet. Osy oraıda ol keshegi Ýnıversıadanyń jabylýynda úsh tilde sóz sóılegen Úkimet basshysy men Almaty qalasy ákimin mysal retinde keltirdi.

«Sondyqtan úıdegi áńgimeni syrtqa kóp shyǵarmaý qajet. Jumys isteý kerek. Mysaly, siz «Shalqar» radıosynyń myqty jýrnalısi bolsańyz, sapaly ári qyzyqty baǵdarlama jasańyz. Ony myna jerde otyrǵandardyń bári tyńdaıdy», - dep atap kórsetti mınıstr.