Abaev: QazAqparat - suranysy eń joǵary ınternet resýrs

ASTANA. QazAqparat - 2016 jyly «QazAqparat» halyqaralyq aqparat agenttigi silteme jasalýy boıynsha birinshi orynǵa shyqty. Bul týraly búgin QR Aqparat jáne kommýnıkatsııalar mınıstrliginiń keńeıtilgen alqa májilisinde vedomstvo basshysy Dáýren Abaev málim etti, dep habarlaıdy QazAqparat.

Mınıstr ótken jyly memlekettik ınternet resýrstardyń aldynda búgingi aýdıtorııanyń suranysyna saı keshendi transformatsııadan ótý mindeti júktelgendigin basa atap ótti.

«Ótken kezeń ishinde «QazAqparat» halyqaralyq aqparat agenttigi elimizdegi suranysy eń joǵary úzdik ınternet resýrstardyń qataryna kirdi. ıAndeks málimetterine sáıkes, 2016 jyly «QazAqparat» silteme jasalýy boıynsha birinshi orynǵa shyqty. «QazAqparattyń» halyqaralyq baǵytyn damytý maqsatynda 2017 jyly onnan astam sheteldik agenttikpen kelisimge qol qoıýdy josparlaýda. Olardyń qatarynda Reıter, Doıche, Press-agentýr syndy agenttikter bar», - dedi ol.

Sondaı-aq onyń aıtýynsha, «Qazkontent» AQ quramyndaǵy 6 saıt ta transformatsııadan ótken. Onyń ishinde «BNews.kz» portalynyń dızaıny, aqparat taratý úrdisi ózgerdi jáne saraptama men taldaý baǵytyna kóshti.

«Jalpy «Qazkontent» AQ quramyndaǵy 8 saıttyń qoldanýshylary jyl saıyn ósip keledi. Ótken jyly ol 50 mıllıonnan asyp jyǵyldy», - dedi Abaev.

Degenmen, mınıstr olarǵa memleket tarapynan kórsetilip otyrǵan qoldaý sharalaryna qaramastan jekemenshik aqparattyq saıttar men resýrstardan artta qalyp otyrǵandyǵyn aıtty.

«QazAqparatqa», eń aldymen «Qazkontentke» reıtıngti kóterý, menedjment pen marketıngti, jobalardyń sapasyn arttyrý boıynsha túbegeıli sheshimder qabyldaý kerek. Aqparat komıtetine «QazAqparat» pen «Qazkontentke» jeke aqparattyq saıttardyń reıtıngin negizge ala otyryp, KRІ bekitýdi tapsyramyn», - dedi Abaev.