Abaev fýtbolshylarymyz APL-dan kem emes oıyn kórsetse, «Qazsportqa» 32 kamera alyp berýge ýáde etti

ASTANA. QazAqparat - Qazaqstan fýtbolshylary aǵylshyn premer lıgasyndaı oıyn órnegin kórsetse «Qazsportqa» 32 kamera alyp berýge daıynbyz. Bul týraly búgin QR Aqparat jáne kommýnıkatsııalar mınıstrliginiń alqa otyrysynda vedomstvo basshysy Dáýren Abaev aıtty, dep habarlaıdy QazAqparat.

Aıta keterligi, otyrys barysynda «Qazaqstan» RTRK» AQ basqarmasynyń tóraǵasy Kemelbek Oıshybaev «Qazsport» telearnasy úshin elimizdiń óńirlerde ótetin  fýtbol oıyndaryn kórsetý problema bolyp otyrǵandyǵyn, ıaǵnı, jyljymaly-televızııalyq stansa  jetispeıtindigin aıtqan edi.

«Mysaly senbi-jeksenbi kúnderi Qazaqstan boıynsha ár oblysta fýtbol oıyndary ótedi. Almaty men Astanany 16 kameralyq JTS-ty qoldanyp sapaly kórsete  alamyz. Al jergilikti jerlerde ótip jatqan fýtboldardy kórsetý qıyn. Bar-joǵy 4 kamera ǵana qoıamyz. Al negizinde fýtbol kórsetý talaptaryna sáıkes keminde 12 nemese 16 kamera qoldanylýy kerek. Máselen, Aǵylshyn premer-lıgasy oıyndarynda 32 kamera qoldanylady», - dedi ol.

Sonymen qatar telearna basshysy qarasha aıynda Qyzylordada ótetin ganboldan Azııa chempıonatyn «Qazsport» telearnasy kórsete almaıtyndyǵyn atap ótti. Oǵan dál sol ýaqytta Almaty men Astanada sharalar josparlanǵanyn aıtty.

«Sondyqtan JTS jibere almaıtyn bolǵandyqtan biz ony kórsetpeımiz dep josparlap otyrmyz. Sebebi gandboldy 4 kameramen kórsetsek sapasy óte tómen bolady. Sondyqtan «Qazsporttyń kórsetilimin damytý úshin bizge JTS máselesin sheship berseńiz úlken qoldaý bolar edi», - dedi ol mınıstr Aqparat jáne kommýnıkatsııalar mınıstri Dáýren Abaevqa qarata.

«Qazsportqa fýtbol oıyndaryn kórsetý úshin 16 kamera jetpeıdi 32 kamera qajet deseńiz, biz ony qoldaýǵa daıynbyz. Biraq bizdiń  fýtbolshylarymyz Aǵylshyn premer-lıgasy sııaqty oınasa», - dep jaýap berdi mınıstr.