Abaev Almaty dárigerleriniń isi týraly: Jelidegi pikirler tergeýge kedergi keltiredi
«Men úzildi-kesildi pikir aıtýdan aýlaqpyn. Sebebi, bolǵan oqıǵanyń mán-jaıynan habarsyzbyn. Munymen quzyrly organdar jáne sot aınalysýda jáne solar naqty sheshim qabyldaıdy. Men tek eki nárseni aıtqym keledi: birinshisi – óte qaıǵyly oqıǵa oryn aldy. Kez kelgen ólim marqumnyń jaqyndary men týystaryna orny tolmaıtyn qaıǵy ákeledi. Ásirese, jas, otbasynyń tiregi bolatyn adamnyń qazasy aýyr. Munda otbasyna kóńil aıtýdan basqa amalymyz joq», - dedi mınıstr «Habar» arnasyndaǵy «Ashyq dıalog» baǵdarlamasynda.
Ol jaǵdaıdyń tym shıelenisip ketkenin aıtty.
«Kimniń kináli ekenin birden aıtý qıyn. Bir aıtarym, ınternette bolyp jatqan daý-damaı búkil protseske kedergi keltiredi. Sebebi, is boıynsha sheshim qabyldaıtyn adamdar qoǵamnyń qyspaǵynda otyr. Taǵy bir ókinishti jaıt – adamdardyń dárigerlerdi nemese polıtseılerdi jappaı qaralaýy. Klavıatýramen aıyptaý ońaı. Biraq, bul pikirdi 9 saǵattyq qıyn otadan shyqqan hırýrgke aıta almaısyz. Úıge qonbaı, qaýipti qylmyskerdi ustaǵan polıtseıge aıta almaısyz. Munyń barlyǵy bizdiń qaýipsizdigimiz úshin. Dárigerler men polıtseıler kún saıyn júzdegen ómirdi qutqarady. Olarǵa qurmetpen qaraǵan jón. Atyshýly is boıynsha sot qana sheshim qabyldaıdy», - dedi D. Abaev.
Esterińizge sala ketsek, tamyz aıynyń sońynda Almaty qalasy Alataý aýdany prokýrorynyń orynbasary, Almaty qalasy Polıtsııa departamenti basshysy Serik Kúdebaevtyń uly Nursultan Kúdebaev kóz jumdy. Jol apatyna túsken N.Kúdebaevqa Almaty qalasynda ota jasalǵan. Operatsııadan keıin em-sharalar qabyldaý maqsatynda ol Germanııaǵa barǵan. Sol jaqta ómirden ozdy.
2 qyrkúıekte tergeý sotynyń qaýlysymen №4 Memlekettik klınıkalyq aýrýhananyń anestezıology Asqar Tuńǵyshbaev eki aıǵa qamaýǵa alyndy. Oǵan «Medıtsınalyq nemese farmatsevtıkalyq qyzmetkerdiń kásibı mindetterin tıisinshe oryndamaýy saldarynan adam ólimine ákep soǵý» baby boıynsha aıyp taǵylyp otyr.
22 qyrkúıek kúni sottyń maquldaýymen, dál osy bappen atalǵan klınıkanyń bas dárigeri Qanat Tezekbaev ta eki aıǵa qamaýǵa alyndy.
Osy eki aralyqta – qyrkúıek aıynda Almaty qalalyq Densaýlyq saqtaý basqarmasynyń bastyǵy Qanat Tósekbaev qyzmetinen ketti. Densaýlyq saqtaý basqarmasy onyń qyzmetten ketýi bul jaǵdaımen esh baılanysy joq ekenin, ol memlekettik basqarý salasyndaǵy oqýyna baılanysty ketkenin aıtty.
Іs boıynsha sotqa deıingi tergeý amaldaryn Almaty qalasy boıynsha Ekonomıkalyq tergeý basqarmasy júrgizedi.
25 qyrkúıek kúni ǵalamtorda Qanat Tezekbaevtyń áıeli Memleket basshysyna joldaǵan úndeýi paıda boldy. Onda Dına Tezekbaeva Nursultan Kúdebaevtyń ólimine kúıeýin kinálap jatqandary týraly jazǵan. Sondaı-aq, áleýmettik jelilerde medıtsınalyq qoǵamdastyqtyń dárigerlerdi qamaýǵa qatysty birqatar úndeýi paıda boldy.
Bul úndeýlerge Prezıdent Qasym-Jomart Toqaev nazar aýdaryp, isti zańdy túrde tergeýdi tapsyrdy.
Densaýlyq saqtaý mınıstri Eljan Birtanov Prezıdenttiń tapsyrmasymen bul máseleni jeke baqylaýyna alǵanyn atap ótip, bárin sabyrǵa shaqyrdy.
Keıin Almaty qalalyq soty Qanat Tezekbaevqa qatysty apellıatsııalyq sot eshqaıda ketpeý týraly qolhat alý túrindegi jańa shara qoldanylǵanyn aıtty.
Sondaı-aq, 25 qyrkúıekte tergeý sotynyń qaýlysymen Asqar Tuńǵyshbaevtyń qamaýǵa alý túrindegi bultartpaý sharasy eshqaıda ketpeý sharasyna ózgertildi.