Abaev: 2016 jyly zorlyq-zombylyqty nasıhattaıtyn 110 myńnan astam materıal joıyldy

ASTANA. QazAqparat - 2016 jyly zorlyq-zombylyq pen sýıtsıd ıdeıalaryn nasıhattaý belgileri bar 110 myńnan astam quqyqqa qaıshy materıal joıyldy. Bul týraly búgin QR Aqparat jáne kommýnıkatsııalar mınıstrliginiń keńeıtilgen alqa májilisinde vedomstvo basshysy Dáýren Abaev málim etti, dep habarlaıdy QazAqparat.

«Mınıstrlik zańnama talaptarynyń saqtalýyn qadaǵalaý úshin aqparattyq alańǵa monıtorıngti turaqty negizde júrgizedi jáne bul sońǵy ýaqytta barynsha ózekti bola tústi. Quqyqqa qaıshy kontent kólemi buryn-sońdy bolyp kórmegen aýqymǵa ıe boldy. Bul rette bizdiń azamattarǵa, ásirese, jasóspirimder men balalarǵa destrýktıvti yqpaldy eskermese bolmaıdy. Muny ózderińiz de jaqsy bilesizder», - dedi mınıstr.

Onyń aıtýynsha, Aqparat jáne kommýnıkatsııalar mınıstrligi quqyqqa qaıshy kontenttermen kúreste sheteldik jetekshi áleýmettik jelilerimen jáne izdeý qyzmetterimen tyǵyz yntymaqtastyqty jolǵa qoıǵan.

«Bul jumystar jalǵasatyn bolady. Atalǵan jumysta máselelerdi eskertý tártibimen sheshýge basymdyq berilgen», - dedi ol.

Mınıstrdiń sózine qaraǵanda, ótken jyly 150 myńnan astam aqparattyq materıalǵa qatysty 500 eskertý haty joldanǵan.

«Nátıjesinde menshik ıeleleri terrorızm men dinı ekstremızm, zorlyq-zombylyq pen sýıtsıd ıdeıalaryn nasıhattaý belgileri bar 110 myńnan astam quqyqqa qaıshy materıaldy joıdy. Munan bólek, 31 myńnan astam aqparattyq materıalǵa qatysty uıǵarym shyǵaryldy. Onyń 26 myńnan astamy zorlyq-zombylyq pen sýıtsıdti nasıhattaý mazmunynda bolǵan. Sot organdaryna 164 silteme men ınternet resýrsqa qatysty 17 talap-aryz berilip, sáıkesinshe sheshim qabyldandy», - dedi Abaev.