«ABAD» uıymy men Túrkistan oblysy ákimdigi kelisim jasady

TÚRKІSTAN. QazAqparat - Keshe, 5 shildede Ázerbaıjan Respýblıkasynyń Prezıdenti janynda qurylǵan azamattarǵa jáne áleýmettik ınnovatsııalarǵa qyzmet kórsetý jónindegi memlekettik agenttigi, «ABAD» zańdy tulǵasy men Qazaqstan Respýblıkasy, Túrkistan oblysynyń ákimdigi arasynda shaǵyn kásipkerlikti damytý salasyndaǵy ózara yntymaqtastyq týraly kelisim jasaldy, dep habarlaıdy QazAqparat óńir basshysynyń baspasóz qyzmetine silteme jasap.

Kelisimge «ABAD» uıymynyń dırektory Rýfat Elchıev pen Túrkistan oblysy ákiminiń orynbasary Meıirjan Myrzalıev qol qoıdy.

Qujat Ázerbaıjan eliniń AVAD modeliniń negizinde Qazaqstan Respýblıkasynyń Túrkistan oblysynda halyqtyq sándik-qoldanbaly óner salasynda shaǵyn jáne mıkro kásipkerlikti damytý úshin yntymaqtastyqty kózdeıdi.

Túrkistan oblysynyń delegatsııasy Ázerbaıjan qolónershileriniń birinshi respýblıkalyq festıvaline qatysyp, Qazaqstan men Ázerbaıjan mádenıetiniń ózara tyǵyz baılanysta ekenin atap ótti.

Ázerbaıjandyqtar Túrkistan oblysy delegatsııasynyń sapary nátıjesin joǵary baǵalady.

Sonymen qatar, osy saparynda Túrkistan oblysy ákiminiń orynbasary M. Myrzalıev Túrkistan qalasyndaǵy Shyǵys bazarynyń qurylysy boıynsha áleýetti ınvestorlarmen kezdesti. Ázerbaıjan ınvestorlary bul salaǵa da qyzyǵýshylyq tanytty. Aldaǵy ýaqytta osy yntymaqtastyqty egjeı-tegjeıli talqylaý jáne óńirde ınvestıtsııalyq jobalardy iske asyrýdy bastaý úshin jaýapty sapar josparlanyp otyr.