A.Aımaǵambetov Anglııada qulpynaı terip júrgen otandastarymyzdyń quqyǵyn qorǵaýdy kóterdi
«Eńbek naryǵy degende mıgranttar faktory da mańyzdy. Relokanttardy aıtpaǵanda, eńbek mıgratsııasynyń ósýi – jahandyq trendterdiń kórinisi. Biraq biz eńbek mıgratsııasyn basqarýymyz kerek, alaıda qazir esh strategııa kórinbeıdi», - dedi A. Aımaǵambetov Májiliste «Qazaqstannyń eńbek naryǵyn damytý jáne kadrlyq áleýetin nyǵaıtý» atty Úkimet saǵatynda.
Oǵan qosa, depýtat basqa elderge jumysqa shyǵatyn azamattardyń quqyqtarymen jetkilikti deńgeıde aınalyspaıtynyn aıtýda.
«Alysqa barmaı-aq, Eýrazııalyq ekonomıkalyq odaqqa enetin elderdi alaıyq. Ártúrli málimet boıynsha, osy odaqta shamamen 200 myń qazaqstandyq jumys istep júr. Bul is júzinde bútin bir salamen teń. Kóptegen otandastarymyz Ońtústik Koreıada eńbek etýde, ol azdaı sońǵy kezderi Anglııada qulpynaı terip júrgen azamattar kóbeıdi. Olardyń sany qansha jáne bul faktorlar bizdiń jumyspen qamtý statıstıkasynda jáne basty saıasatta eskerile me – ony bilmeımiz.
Bizdiń eldiń azamattary jumys isteıtin barlyq memleketpen, tipti bir ǵana otandasymyz jumys isteıtin bolsa da, olardyń quqyqtaryn qorǵaý boıynsha kelisimder jasalýy kerek», - dedi A. Aımaǵambetov.
Buǵan deıin Májilis depýtaty eldegi jumyspen qamtý sharalarynyń tıimdi bolmaǵanyn synaǵan edi.
Sondaı-aq, Qazaqstanda «jumys isteıtin kedeıler» fenomeni beleń alǵanyn aıtýda.