AÁK-ti zańsyz alǵandar aqshany óz erikterimen qaıtaryp jatyr

NUR-SULTAN. QazAqparat - Ataýly áleýmettik kómektiń zańsyz taǵaıyndalýyna jergilikti atqarýshy organdar qyzmetkerleriniń de kinási bar. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi.

«Jyl basynan beri ataýly áleýmettik kómek alý úshin tabystary men dúnıe-múlkin jasyrǵan 73 714 otbasy anyqtaldy. Atalǵan faktilerge qatysty alýshylar ǵana kináli emes degenmen kelisemin. Biraq, kiristerin jasyryp qalǵan adamdar jaýapty. Árıne, AÁK taǵaıyndaýmen aınalysqan jergilikti atqarýshy organdar qyzmetkerleriniń de kinási bar. Sondyqtan óz mindettemesin jaýapsyz oryndaǵany úshin jazalaý máselesin 9 aıdyń qorytyndysy boıynsha qarastyramyz. Ákimderge sondaı tapsyrma berildi», - dedi mınıstr.

Onyń atap ótýinshe, qazirgi ýaqytta ataýly áleýmettik kómekti zańsyz alǵan otbasylar qarajattaryn qaıtadan memleketke óz erikterimen qaıtaryp jatyr.

«Bireýleri búkil somany, endi biri birtindep qaıtaryp jatyr. Artyq tólengenderge aldaǵy aılardyń tólemderinen ustalady. Jazalaý sharalary bolmaıdy. Aqshany qaıtarmaı, sotqa júgingen jaǵdaı bolǵan joq», - dedi Birjan Nurymbetov.