AÁK alýshylardyń sany 2 ese qysqarady

NUR-SULTAN. QazAqparat - Ataýly áleýmettik kómek alýshylardyń sany 2 esege jýyq qysqarýy múmkin. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Eńbek jáne halyqty áleýmettik qorǵaý mınıstri Birjan Nurymbetov málim etti, dep habarlaıdy QazAqparat tilshisi.

«Búginde ataýly áleýmettik kómekti 306 myń otbasy nemese shamamen 1,6 mıllıon adam alady. Bizdiń boljamymyzsha, AÁK alýshylardyń sany qysqarýy múmkin. Biraq, shamamen 900 myń adam bul kómek túrin alady dep oılaımyz», - dedi mınıstr.

Onyń atap ótýinshe, kópbalaly otbasynyń tabysy memleket tarapynan beriletin járdemaqyny qosqan kezde de kedeıshilik sheginen joǵary bolmasa, onda mundaı otbasyǵa járdemaqyǵa qosa AÁK-te beriledi. Osy rette mınıstr memleket mundaı qadamǵa nelikten baryp otyrǵandyǵyn túsindirip ótti.

«Mynadaı jaǵdaı bar. Eki otbasy da da bes besten bala bar. Bir otbasy az qamtylǵandar sanatyna ilikse, ekinshisi kirisiniń nebári 400-500 teńgege asyp ketýine baılanysty ilige almaı qaldy. Mundaı jaǵdaıda ol otbasy AÁK ala almaıdy. Biraq, biz eki otbasynyń da ómirlik jaǵdaılary birdeı ekendigin túsinemiz. Sondyqtan AÁK retinde tólep otyrǵan tólemderdiń bir bóligin otbasy kirisine qaramastan taǵaıyndalatyn járdemaqyǵa aýystyrý týraly sheshim qabyldadyq», - dedi Birjan Nurymbetov.