Á.Jaqsybekov elordadaǵy jańa mektepterdiń oqý jylyna ázirligin tekserdi

ASTANA. QazAqparat - 1 qyrkúıek kúni Astanada úsh jańa mektep oqýshylarǵa óz esigin ashady: Orynbor kóshesi boıyndaǵy №77 mektep-gımnazııasy, «Komsomolskıı» TA №79 mektep-gımnazııasy jáne «Batyǵaı» TK daryndy balalarǵa arnalǵan №81 «Astana English school» gımnazııasy. Barlyq mektepter Esil aýdanynda ornalasqan jáne árqaısysy 1200 oqýshyǵa laıyqtalǵan, dep habarlaıdy Astana ákiminiń baspasóz qyzmetinen.

Búgin kóshpeli keńes barysynda Astana ákimi Ádilbek Jaqsybekov jańa bilim berý mekemeleriniń materıaldyq-tehnıkalyq bazasymen tanysyp, 1 qyrkúıekke daıyndyǵyn tekserdi. Ákim ustazdar quramynyń jańa oqý jylyna daıyndyq barysymen jáne mektep kitaphanasynyń oqý ádebıetimen qamtylýynan habardar boldy. Qala basshysy elordadaǵy bilim berý júıesi básekege qabiletti bolý kerektigin, ár mektepke zamanaýı sandyq bilim berý resýrstaryn engizý qajettigin atap ótti. - Ustazdar únemi biliktiligin arttyryp otyrýy kerek. Bilim berý salasynyń budan bylaıǵy nátıjeli damýy «Bes ınstıtýtsıonaldy reformany iske asyrý boıynsha 100 naqty qadam» Ult josparynda kórsetilgen. Bizdiń basty maqsatymyz - balanyń mektepte damýy úshin barlyq múmkindikter jasaý, - dep atap ótti qala basshysy. Jańa oqý jylynda elordalyq 17 myń bala birinshi synypqa barady, bul byltyrǵy oqý jylyna qaraǵanda 2 myń oqýshyǵa artyq. Sonymen qatar búgin Ádilbek Jaqsybekov astanalyq tsırktiń, «Barys» sport kesheniniń, «Qazaqstan» sport saraıynyń jáne Q.Muńaıtpasov atyndaǵy alańnyń jaǵdaıyn tekserdi. Qala basshysy sportshylardyń kásibı daıyndyǵy jáne qala turǵyndary men qonaqtarynyń demalysyn ótkizýge sapaly qyzmet kórsetý qajettigine atalǵan nysandar jetekshileriniń nazaryn aýdardy.