A. Sársenbaıulynyń, V. Jýravlevtiń jáne B. Baıbosynnyń óltirilýine qatysty QR Bas prokýratýrasynyń resmı málimdemesi
2006 jylǵy 11 aqpanda Almaty qalasynda Altynbek Sársenbaıulynyń, Vasılıı Jýravlevtiń jáne Baýyrjan Baıbosynnyń urlanyp, óltirilýi oryn alǵan bolatyn.
Іshki ister organdarymen tergelý barysynda osy qylmysqa qatysty tulǵalar anyqtalǵan. Ol Rýstam Ibragımov jáne taǵy basqa 9 tulǵa.
Óz kezeginde Ibragımov Altynbek Sársenbaıulyn óltirýge tapsyrys berýshi retinde sol sátte Qazaqstan Respýblıkasy Parlamenti Senatynyń apparat jetekshisi laýazymyn atqaryp otyrǵan Erjan Ótembaevtyń atyn aıtty.
Tergeýmen anyqtalǵan barlyq tulǵalar 2006 jylǵy 31 tamyzda Almaty oblystyq sotymen uzaq merzimge bas bostandyqtarynan aıyrýǵa, al Ibragımov tikeleı uıymdastyrýshy jáne oryndaýshy retinde keıinnen ómir boıyna bas bostandyǵyn shekteýge aýystyrylǵan jazalaýdyń joǵarǵy sharasyna tartyldy.
Deı turǵanmen, 2012 jylǵy 16 sáýirde túzeý mekemesinde jazasyn óteýdegi Ibragımov jasalǵan qylmystyń budan buryn quqyq qorǵaý jáne sot organdaryna belgili bolmaǵan mán-jaılar habarlanǵan aryzben Qazaqstan Respýblıkasynyń Joǵarǵy Sotyna júgindi.
Bul aryzda ol birinshi ret adam óltirýdi jasaǵanyn moıyndady, ony jasaý mán-jaılaryn egjeı-tegjeıli beınelep berdi, sondaı-aq Altynbek Sársenbaıulyn óltirýge tapsyrys berýshi shyn máninde Erjan Ótembaev emes, Rahat Álıev pen Álnur Musaev ekenderin kórsetti.
Qazaqstan Respýblıkasy Joǵarǵy Sotynyń tapsyrmasy boıynsha qosymsha alynǵan jaýaptardyń shynaılyǵy Bas prokýratýra, Ulttyq qaýipsizdik komıteti jáne Іshki ister mınıstrligi qyzmetkerlerinen arnaıy qurylǵan jedel-tergeý tobymen tekserildi.
Bul rette, Qazaqstan Respýblıkasy Bas prokýratýrasynyń ótinishi boıynsha tergeýge Amerıka Qurama Shtattarynyń Federaldyq Tergeý Bıýrosy tikeleı qatysty.
Tergeý nátıjelerimen jańadan ashylǵan mán-jaılar óz dálelin tapty.
Atap aıtqanda, 2006 jyly Rýstam Ibragımov polıgrafologııalyq zertteý jáne AQSh-tyń Federaldyq Tergeý Bıýrosynyń agentterine bergen suhbatynan keıin olarǵa adam óltirýdiń shyn mánindegi tapsyrys berýshisi Rahat Álıev ekendigin aıtqany anyqtaldy.
Bul rette, Ibragımov Álıev pen Musaevtyń tarapynan óziniń otbasynyń qaýipsizdigi qaterinen quqyq qorǵaý organdaryna resmı jaýap berýden bas tartqan jáne bul aqparatty jarııalamaýdy suraǵan.
Qazirgi ýaqytta Rýstam Ibragımovtyń aryzyn tergeý sheńberinde AQSh-tyń Federaldyq Tergeý Bıýrosy bul aqparatty ózara árekettesý barysynda tıisti qujattardy usyna otyryp, rastady.
Jańa tergeý barysynda Ibragımov jeke bas arazdyǵyna oraı, rasynda da Erjan Ótembaev odan Altynbek Sársenbaıulyn uryp-soǵýdy suraǵanyn kórsetti. Bul jóninde Rahat Álıevke málim bolǵan. Ol Álnur Musaevpen birlesip, jaǵdaıdy paıdalanyp qalýdy sheshken jáne Erjan Ótembaevtyń tapsyrysyn oryndamaqshy bolyp, Ibragımovqa Altynbek Sársenbaıulyn óltirýdi tapsyrǵan.
Ibragımovtyń ýájderi tergeý barysynda jınaqtalǵan obektıvti dáleldemelermen tolyqtaı rastaldy. Álıev pen Musaevtyń Altynbek Sársenbaıulyn jáne onyń eki serigin óltirýge tapsyrys berýge jáne uıymdastyrýǵa qatystylyǵy jónindegi nusqany rastaıtyn jańa zattaı dáleldemeler men kýálerdiń jaýaptary alyndy.
2013 jylǵy tamyzda Rýstam Ibragımovtyń jáne birqatar basty kýálerdiń tıisti jaýaptary shaqyrylǵan AQSh-tyń Federaldyq Tergeý Bıýrosynyń polıgrafolog-mamandarymen shynaılyq mánine tekserilip, rastaldy.
Joǵaryda keltirilgen jaıttarǵa baılanysty, 2013 jylǵy 11 jeltoqsanda Bas prokýratýramen Qazaqstan Respýblıkasynyń Joǵarǵy Sotyna Altynbek Sársenbaıulyn, Vasılıı Jýravlevti jáne Baýyrjan Baıbosyndy óltirý jónindegi is boıynsha shyǵarylǵan úkimdi ishinara qaıta qaraý qajettigi týraly qorytyndy joldandy.
2013 jylǵy 19 jeltoqsanda Qazaqstan Respýblıkasynyń Joǵarǵy Sotymen Rýstam Ibragımovtyń aryzyn qaraý nátıjesi boıynsha jáne jınaqtalǵan jańa materıaldar eskerilip, Erjan Ótembaevqa qatysty budan buryn qaýly etilgen úkim ishinara buzyldy.
Qylmystyń ózge qatysýshylaryna qatysty úkimdi qaıta qaraý úshin negizder anyqtalmady, sebebi, tabylǵan jańa dáleldemeler olardyń áreketteriniń saralanýyna áser etpeıdi.
Dál osy kúni, 19 jeltoqsanda Joǵarǵy Sot qylmystyq isti Almaty oblysynyń qylmystyq ister jónindegi mamandandyrylǵan aýdanaralyq sotyna qaıta qaraýǵa jiberdi.
Tıisti sot sheshimi qabyldanǵan jaǵdaıda Rahat Álıevke jáne Álnur Musaevqa qatysty tikeleı qylmystyq is qozǵalyp, AQSh-tyń Federaldyq Tergeý Bıýrosy qyzmetkerleriniń qatysýymen olardyń Altynbek Sársenbaıulynyń, Vasılıı Jýravlevtiń jáne Baýyrjan Baıbosynnyń óltirilýine qatystylyǵy mánine aldyn ala tergeý júrgiziletin bolady.
Kórsetilgen quqyqtyq protsesterdiń nátıjeleri týraly qosymsha habarlanady.