A.Sársenbaıulynyń ólimine qatysty tergeýge AQSh-tyń Federaldyq Tergeý Bıýrosy atsalysady
11:50, 20 Jeltoqsan 2013
ASTANA. 20 jeltoqsan. QazAqparat - Altynbek Sársenbaıulynyń ólimine qatysty tergeýge AQSh-tyń Federaldyq Tergeý Bıýrosy tartylatyn bolady.
Bul týraly búgin QR Bas prokýrorynyń orynbasary Andreı Kravchenko málim etti.
Onyń aıtýynsha, 19 jeltoqsanda Joǵarǵy Sot qylmystyq isti Almaty oblysynyń qylmystyq ister jónindegi mamandandyrylǵan aýdanaralyq sotyna qaıta qaraýǵa jiberdi.
«Tıisti sot sheshimi qabyldanǵan jaǵdaıda Rahat Álıevke jáne Álnur Musaevqa qatysty tikeleı qylmystyq is qozǵalyp, AQSh-tyń Federaldyq Tergeý Bıýrosy qyzmetkerleriniń qatysýymen olardyń Altynbek Sársenbaıulynyń, Vasılıı Jýravlevtiń jáne Baýyrjan Baıbosynnyń óltirilýine qatystylyǵy mánine aldyn ala tergeý júrgiziletin bolady», - dedi ol.
Búgin habarlanǵanyndaı, Altynbek Sársenbaıulyn óltirýge tapsyrys bergen Rahat Álıev pen Álnur Musaev ekendikteri anyqtaldy. Qazirgi ýaqytta birlesken tergeý júrip jatyr.