A. Raý bastaǵan úkimettik jumys toby Qaraǵandy oblysynda boldy
Top músheleri eldiń Indýstrııalandyrý kartasy baǵdarlamasy aıasynda ınvestıtsııalyq baǵdarlamalar júzege asyrylyp jatqan birqatar ónerkásiptik kásiporyndardy aralady. Odan keıin A.Raý Údemeli ındýstrııalyq-ınnovatsııalyq damý jónindegi aımaqtyq úılestirý keńesiniń otyrysyna qatysty.
Sonymen qatar Indýstrııa jáne jańa tehnologııalar birinshi vıtse-mınıstri oblys ákimdiginde 2010-2014 jyldarǵa arnalǵan ÚIIDB alǵashqy jylynyń qorytyndysyna arnalǵan keńeıtilgen otyrys ótkizdi. Damý ınstıtýttarynyń ókilderi jınalǵan kásiporyn basshylaryna jańa bıznesti qoldaý tetikteri jaıly aıtyp ótti. «Ónimdilik-2020» baǵdarlamasy tanystyryldy.
«Memleket basshysynyń tapsyrmasy boıynsha biz qazir barlyq aımaqtardy aralap júrmiz. Bizdi birinshi kezekte byltyrǵy jyly eldiń Indýstrııalandyrý kartasy aıasynda paıdalanýǵa berilgen jobalardyń qazirgi jaǵdaıy qyzyqtyrady. Sondaı-aq biz basqa da jobalardyń júzege asyrylý barysymen tanysatyn bolamyz. Saparlardyń taǵy bir maqsaty - bıznesti qoldaýdyń jańa quraldary týraly sóz qozǵaý», - dedi jýrnalısterge bergen suhbatynda A.Raý.
«Qaraǵandy oblysynda búgingi tańda Indýstrııalandyrý kartasyna jalpy quny 213 mlrd. teńge bolatyn 23 ınvestıtsııalyq joba engizilgen, sol arqyly jańadan 3 607 jumys ornyn ashý kózdelip otyr», - dedi ÚIIDB jónindegi úılestirý keńesiniń otyrysynda oblystyq kásipkerlik jáne ónerkásip basqarmasynyń bastyǵy Erbolat Kargın.