A. Perýashev: Álıhan Bókeıhannyń 150 jyldyǵyn laıyqty atap ótý jóninde memlekettik komıssııa qurý qajet
Sóz arasynda depýtat Azat Perýashev 2016 jyly «Alash» ult-azattyq qozǵalysynyń negizin qalaýshy, Alashorda Úkimetiniń tóraǵasy Álıhan Bókeıhannyń 150 jyldyǵy, al 2017 jyly «Alash» ult-azattyq qozǵalysynyń 100 jyldyǵy ekenin eske saldy.
«Alash» ult-azattyq qozǵalysynyń qyzmeti, jalpy Alash ıdeıasy qazaq qoǵamyn Eýropa jolymen jańǵyrtýdy basty baǵyttarynyń biri retinde ustanǵan, sol zamannyń naqty jaǵdaılaryna beıimdep, ulttyq memlekettilikti qalyptastyrýǵa umtylǵanyn jurtshylyq baıyptap keledi. Parıjdegi ıÝNESKO Atqarýshy keńesiniń qarasha aıyna belgilengen Uıymnyń Bas konferentsııasynda qabyldaý úshin joldanǵan usynystardyń ishinde 2016 jyly qoǵam jáne memleket qaıratkeri Álıhan Bókeıhannyń 150 jyldyǵyn ıÝNESKO kóleminde atap ótý jaıynyń qarastyrylýy da osynyń aıǵaǵy. Bul Alash murasyn álemdik deńgeıge shyǵaryp, nasıhattaýdyń taptyrmaıtyn múmkindigi týyp tur degen sóz», - dedi A. Perýashev.
Bul rette depýtat Elbasy N. Nazarbaev jarııalaǵan Máńgilik El ıdeıasy aıasynda Alash jolyn elimizde de, halyqaralyq deńgeıde de zerdeleı túsý kerektigin alǵa tartady.
«Prezıdent N. Nazarbaev «Tarıh tolqynynda» atty kitabynda: «HH ǵasyrdyń basyndaǵy qazaq qoǵamyndaǵy zııaly qaýym qalyptasýynyń urpaqtar estafetasy sekildi sıpaty bolǵanyn atap aıtqan abzal», - dep kórsetken bolatyn. Sondyqtan da, Álıhan Bókeıhannyń 150 jyldyǵyn laıyqty atap ótkizý jóninde memlekettik komıssııa qurý qajet dep sanaımyz. Onyń negizgi maqsaty jaı ǵana toı toılaý emes, oı oılaýmen, artynan iz qalatyn tanymdyq-taǵylymdyq turǵydan ultymyzdyń, memleketimizdiń rýhyn kóteretin, qoǵamdyq sanaǵa silkinis týdyratyn mazmundy sharalardy iske asyrýdy qamtamasyz etý bolýy tıis», - dedi Azat Perýashev.