«A-Parking» júıesiniń arqasynda salyq túsimi 5 ese artqan - Baýyrjan Baıbek

ALMATY. QazAqparat - Búgin Úkimet otyrysynda Baýyrjan Baıbek Memleket basshysynyń tapsyrmasymen Almatyda tsıfrlandyrý boıynsha qandaı jumystar júrgizilip jatqanyn aıtty, dep habarlaıdy QazAqparat tilshisi.

Ákim bıyl qalada «Smart Almaty» jol kartasynyń tujyrymdamasy daıyndalyp jatqanyn tilge tıek etti.

Onyń aıtýynsha, búginniń ózinde elektrondy saýda úlesiniń 40%-y men kartamen eseptesýdiń 54%-y Almatynyń enshisinde.

Azamattarǵa kórsetilgen elektrondy memlekettik qyzmet túrleri 8 esege artyp, 1,4 mıllıonǵa jetti.

«IT-sheshim qabyldamas buryn jobanyń ekonomıkalyq turǵydan tıimdiligine basa nazar aýdaramyz. Birneshe jobanyń arqasynda kólegeıli ekonomıkanyń úlesi azaıyp, kólik júıesi naryqtyq fýnktsııaǵa kóshti. Ońaı júıesi arqyly quny 20 mlrd teńge bolatyn 350 mln tranzaktsııa jasaldy. «A-Parking» júıesimen qala turaqtarynyń 10%-y qamtylǵan. Bul qalanyń salyq túsimin 5 esege arttyrdy, ıaǵnı 38 mln teńgeden 190 mln teńgege jetti. Búginde marshrýttardy ońtaılandyrýdyń ıntellektýaldy kólik júıesin jasap jatyrmyz», - dedi B.Baıbek.

Qala ákimi almatygenplan.kz saıtynda qyzyl jeliler men elektr, jylý júıeleri týraly aqparat ashyq berilgenin aıtty.

2018 jyly qalanyń 3D-kartasy jasalyp, ınfraqurylymnyń tsıfrlyq qujattandyrýy aıaqtalady.

Sonymen qatar, qalada pılottyq rejimde «Elektrondy PIK» júıesi iske qosyldy.

Aıta ketý kerek, Almatyda «Open Almaty» jańa formattaǵy qoǵamdyq qabyldaý ashylǵan bolatyn.

Munda 5 myń adamnyń shaǵymy qabyldanyp, open space qaǵıdaty boıynsha quqyqtyq qyzmet ortalyǵy ashyldy. Balabaqsha men mektepterge, baspanaǵa qujat qabyldaý protsesteri avtomattandyrylǵan.