A. Muhamedıuly: Mýzeıler ǵylymı mekemeler, JOO-lar, muraǵattar men kitaphanalar yntymaqtastyǵynyń tirek ortalyǵyna aınalýy tıis

ASTANA. QazAqparat - Qazaqstannyń mýzeıleri ǵylymı mekemelerdiń, ýnıversıtetterdiń, muraǵattardyń, kitaphanalardyń ózara árekettestigi men yntymaqtastyǵynyń tirek ortalyǵyna aınalýy tıis, - dedi QR Mádenıet jáne sport mınıstri A. Muhamedıuly QR Prezıdentiniń «Qazaqstan jańa jahandyq naqty ahýalda: ósim, reformalar, damý» atty Joldaýyn talqylaýǵa arnalǵan vedomstvonyń keńeıtilgen alqa jıynynda.

Bul týraly QR MSM baspasóz qyzmetinen habarlady.

Qazaqstan Respýblıkasy Mádenıet jáne sport mınıstrliginiń kele jatqan jańa jyldaǵy qyzmetiniń perspektıvalary týraly sózinde Arystanbek Muhamedıuly otandyq mýzeıler jumysyn jańǵyrtý qajettigine basa toqtalyp ótti. Mýzeı qyzmetiniń basty baǵyty ǵylymı zertteý salasynda júrgizilýi tıis. Ol tarıh, arheologııa, restavratsııa, ónertaný, mádenı-bilimdik is-sharalar, kádesyı ındýstrııasy, servıs jáne t.b. baǵyttar boıynsha qalyptasatyn bolady.

«Salanyń týrıstik áleýetin damytý maqsatynda «Esik», «Ejelgi Taraz», «Berel» qoryq-mýzeıleriniń aýmaǵynda ınternet-dámhanasy, oqý jáne kórme zaldary, kádesyı pavılondary bar Vızıt-ortalyqtar qurylǵan jáne olar kelýshiler arasynda úlken tabysqa ıe», - dedi vedomstvo basshysy.

Sondaı-aq ol halyqaralyq yntymaqtastyqty jandandyrý aıasynda Mınıstrlik sheteldik ǵalymdarmen tyǵyz ári úzdiksiz baılanys jasap jatqandyǵyn da aıtyp ketti. Onyń paıymdaýynsha, Berel qorǵany, «Tamǵaly» arheologııalyq landshaftyń petroglıfteri jáne taǵy da basqa Qazaqstannyń birqatar belgili arheologııalyq eskertkishterin saqtaý jáne zertteý boıynsha birlesken jobalarǵa qatysýǵa norvegııalyq jáne nemis ǵalymdary qyzyǵýshylyq tanytýda.

«Bundaı halyqaralyq yntymaqtastyq Qazaqstandaǵy ǵylymı-zertteý jobalaryna sheteldik ınvestıtsııalar tartýǵa múmkindik beredi», - degen pikirde A. Muhamedıuly.