Á.Qusaıynov saılaýaldy baǵdarlamasyn QR Prezıdenttigine úmitker retinde tirkelgennen keıin jarııalaıdy
13:09, 14 Naýryz 2015
ASTANA. QazAqparat - Ábilǵazy Qusaıynov saılaýaldy baǵdarlamasyn QR Prezıdenttigine kandıdat retinde tirkelgennen keıin jarııalaıdy. Bul týraly ol búgin QR Prezıdenttigine úmitkerlerdiń memlekettik tildi erkin meńgergendigin anyqtaý jónindegi lıngvıstıkalyq komıssııa synynan ótkennen keıin málimdedi.
«Úsh kezeńnen turatyn memlekettik tildi erkin meńgergendikti anyqtaý synaǵynan óttim. Birinshi kezeńde jazba jumysyn jazyp, ekinshisinde mátin oqydym. Úshinshi kezeńde belgilengen taqyryp boıynsha erkin áńgime boldy. Menińshe synaqtyń úsh kezeńin de jaqsy tapsyrdym. Ony komıssııa tóraǵasynan ózderińiz de estidińizder», - dedi Á.Qusaıynov synaqtan keıin.
Sonymen qatar ol lıngvıstıkalyq komıssııa árbir kandıdatqa ádil bolǵanyn basa aıtty.
«Saılaýaldy baǵdarlamamdy jarııalaýǵa áli erte. Búgingi kúngi basty másele tirkeýden ótip, 93 myń qoldaý qolyn jınaý kerek. Sodan keıin men ózimniń saılaýaldy baǵdarlamamdy jarııa etetin bolamyn», - dedi ol BAQ ókilderiniń saýalyna oraı.