A. Kúrishbaev elorda ardagerleriniń úıine baryp, Jeńis kúnimen quttyqtady

ASTANA. 4 mamyr. QazAqparat - Búgin Astana qalalyq máslıhatynyń depýtaty, S. Seıfýllın atyndaǵy Qazaq agrotehnıkalyq ýnıversıtetiniń rektory, professor Aqylbek Kúrishbaev Jeńis kúni aıasynda Uly Otan soǵysyna qatysqan №6 saılaý aımaǵynda turatyn ardagerlerdi úıine baryp quttyqtady, dep habarlaıdy atalmysh ýnıversıtettiń baspasóz qyzmeti.

Bizdiń jarqyn bolashaǵymyz úshin jandaryn shúberekke túıip, Otan qorǵaǵandar aramyzda óte az qaldy. Olar búgingi óskeleń urpaq úshin óshpes erlik pen keremet otansúıgishtiktiń qaıtalanbas úlgisin kórsetti.

Aqylbek Kúrishbaev maıdan dalasyndaǵy keskilesken urystar týraly ardagerler aıtqan estelikterdi uıyp tyńdap, soǵystan keıingi qıraǵan halyq sharýashylyǵyn kóterýge qatysqan janqııarlyq eńbekter týraly estip bildi. Jasy 101-ge kelgen soǵys ardageri Rodıon Skok rektormen áńgime barysynda «sońǵy kezderi aıaǵym aýyryp júrgeni, áıtpese, Jeńis kúni óz aıaǵymmen júrip, qydyrǵandy jaqsy kóretin janmyn» dep aǵynan jaryldy. Varvara Grıbneva «jasym 92-ge keldi, qudaıǵa shúkir, densaýlyǵym jaqsy. Osylaı úıge kelip quttyqtaǵan ystyq lebizderińizge kóp rahmet. Elimiz aman, jurtymyz tynysh bolǵaı» dep batasyn berdi.

«Ardagerlerdiń jany jas» - bul sózder qan maıdandy kózimen kórgen búgingi bizdiń ardagerlerge de aıtylǵandaı. Búginde sizder qoǵamdyq eńbekten tys qalmaı, elimiz ben elordanyń ómir-tirshiligine belsene aralasyp jas urpaqqa úlgi kórsetip júrsizder», - atap ótti qalalyq máslıhat depýtaty Aqylbek Kúrishbaev ardagerlerge arnalǵan sózinde.

Qarııalar kezdesý sonynda depýtatqa alǵystaryn bildirip batalaryn berdi.