A korpýsyndaǵy memlekettik qyzmetshilerge amerıkalyq mamandar dáris oqıdy
QR Prezıdenti Ákimshiliginiń bastamasymen uıymdastyrylǵan bul jıynda mınıstrlikterdiń jaýapty hatshylary men oblystyq apparat basshylary kóshbasshylyq negizderi boıynsha amerıkalyq mamandardyń dárisin tyńdaıdy, basqarýdaǵy kúrdeli mindetterdi oryndaý tásilderimen tanysyp, jahandyq álemdegi zamanaýı synaqtarǵa tótep berý joldarymen tanysady.
«Qazaqstan memlekettik qyzmetin damytýdyń búgingi satysynda "A koprýsynyń", kásibı memlekettik qyzmettegi eń joǵary laýazym bolyp tabylatyn jaýapty hatshylar men apparat jetekshileriniń orny erekshe. Sizder barlyq memlekettik organdaǵy kadrlardy basqarasyzdar, olardyń úılesimdi jumysyn qamtamasyz etesizder. Sizder bul laýazymdarǵa bilimderińiz ben eńbekterińizdiń arqasynda, óte kúrdeli synaqtardan ótip taǵaıyndaldyńyzdar. Degenmen, ári qaraı da óz áleýetterińizdi tolyq paıdalaný úshin álemde bolyp jatqan ozyq ıdeıalardy, kóshbasshylyq, jetekshilik basqarýdyń jańa tásilderin meńgergenderińiz abzal», - dedi memlekettik qyzmet salasyndaǵy Astana haby basqarýshy komıtetiniń tóraǵasy Álıhan Baımenov semınardyń ashylý saltanatynda.
Sondaı-aq, komıtet tóraǵasy amerıkalyq ınstıtýtty tańdaýdyń da ózindik sebebi bar ekenin atap ótti.
«Ne sebepti AQSh memlekettik qyzmetshilerdiń biliktiligin arttyrý ınstıtýty? Sebebi, bizde «A korpýs», olarda - «Senior Executive Service» dep atalatyn laýazymdardy álem boıynsha alǵash ret AQSh engizgen. Dál osy ınstıtýt 50 jyldan beri joǵary laýazymdy memlekettik qyzmetshiler úshin semınarlar ótkizip keledi», - dep óz sózin túıindedi Á.Baımenov.