«A» korpýsyndaǵy laýazym sany eki esege qysqartyldy

ASTANA. QazAqparat - «A» korpýsyndaǵy laýazym sany eki esege qysqartyldy. Bul týraly búgin Astanada ótken brıfıngte Memlekettik qyzmet isteri jáne sybaılas jemqorlyqqa qarsy is-qımyl agenttiginiń memlekettik qyzmet isteri departamenti dırektorynyń orynbasary Áıgerim Ámirova málim etti.

«5 sáýirde Prezıdent Jarlyǵymen «A» korpýsynyń laýazym tizimderi ońtaılandyryldy. Saraptama barysynda keıbir laýazymdarda basqarýshylyq ókilettik joq ekenin anyqtadyq. Mysaly, ortalyq memlekettik organdarlyń qurylymdyq bólimsheleriniń basshylary, táýelsiz basqarý sheshimderin qabyldamaıtyn sektor basshylary, Prezıdent Ákimshiliginiń sektor meńgerýshileri. Laýazym tizimi shamamen eki esege - 519-dan 278-ge deıin qysqartyldy. Bul olarmen qyzmette joǵarylaýy, oqytylýy boıynsha naqty jumys isteýge múmkindik beredi», - dep atap ótti ol.

Áıgerim Ámirovanyń aıtýynsha, osy jumystardyń nátıjesinde «A» korpýsynda basqarý ókilettiligi bar tórt laýazym kategorııasy qamtylyp otyr. Olar - jaýapty xatshylar, komıtet tóraǵalary, jergilikti jáne ortalyq apparat basshylary men aýdan ákimderi.

Sonymen qatar barlyq azamattardyń arasynda konkýrstyq irikteýmen birge, memlekettik organ qyzmetshileriniń qosymsha qyzmet satysyn jyljý mexanızmi qarastyrylǵan. Osylaısha, «A» korpýsy kadrlyq rezervine jalpy irikteý konkýrsyn kútpeı-aq, kadrlyq saıasat boıynsha Ulttyq komıssııanyń sheshimimen aýdanda nemese vedomstvoda, osy memlekettik qyzmetshi rezervtiń esebine qosylady. Sondaı-aq tulǵa osy laýazymǵa eki jyl ishinde ıe bolýy tıis.