«A» korpýsy úmitti aqtady ma?» - baspasózge sholý
***
«Keshe Elbasy Qazaqstanǵa memlekettik saparmen kelgen Qyrǵyz Respýblıkasynyń Prezıdenti Almazbek Atambaevpen kezdesti. Shaǵyn quramdaǵy kezdesý barysynda saýda-ekonomıkalyq, ınvestıtsııalyq, otyn-energetıkalyq, kólik-tranzıttik jáne mádenı-gýmanıtarlyq salalardaǵy yntymaqtastyqty nyǵaıtý máseleleri talqylandy», - dep jazady «Egemen Qazaqstan» gazeti senbilik sanyndaǵy «Qazaqstan-Qyrǵyzstan: Strategııalyq seriktestiktiń arqaýy berik» degen taqyryptaǵy maqalasynda. Qazaqstan basshysy Qazaqstan-Qyrǵyzstan Joǵary memleketaralyq keńesiniń buǵan deıin, ıaǵnı 2012 jyly Bishkektegi otyrysynan keıin kóp oqıǵa ótip, kóp ózgeristiń oryn alǵanyna toqtaldy. Sondaı-aq, elder arasyndaǵy ekijaqty saýda qatynastary órleý traektorııasy boıynsha damyp kele jatqanyn aıtty. Máselen, sońǵy 2 jylda taýar aınalymy turaqty túrde 1 mıllıard dollardan asqan. Óńirlik jáne álemdik ekonomıkadaǵy kúrdeli ahýalǵa qaramastan, bıylǵy jyldyń 8 aıynda ósim 5,2 paıyzdy quraǵan. Qyrǵyzstan tarapynan eksporttalatyn búkil elektr energııasynyń shamamen 86 paıyzy, sút ónimderiniń 90 paıyzy, kókónister men jemis-jıdektiń 56 paıyzy Qazaqstanǵa keledi. Al Qyrǵyzstan ımportyndaǵy bıdaıǵa degen qajettiliktiń 100 paıyzy derlik, unnyń 97 paıyzy, mıneraldy shıkizattyń 70 paıyzy, organıkalyq emes hımııalyq zattardyń 53 paıyzy Qazaqstannan jetkiziledi. Qazaqstan-Qyrǵyzstan Joǵary memleketaralyq keńesiniń 4-shi otyrysynan keıin Memleket basshylary birlesken málimdeme jasady. Birlesken brıfıng barysynda Qazaqstan basshysy óz sózinde Qyrǵyzstan elimizdiń Ortalyq Azııadaǵy mańyzdy odaqtasynyń biri jáne strategııalyq áriptesi ekenin aıtty. «Bizdiń yntymaqtastyǵymyz aıryqsha senim jáne týyndaıtyn máselelerdiń bárin sheshýge degen syndarly qadammen erekshelenedi. Búgingi sapar - eki eldiń arasyndaǵy berik baılanystardyń taǵy bir aıǵaǵy», - dedi Qazaqstan Prezıdenti.
«Jańa basshy jaıly oryntaqqa otyrysymen-aq ózinen burynǵy basshynyń bitirgen isterin bekerge shyǵaryp, qolǵa alǵan bastamalaryn aıaqsyz qaldyryp, «Jańa sypyrǵy jańasha sypyrady» degen orys mátelindegideı, bárin ózinshe jasaıtyn «dástúr» qalyptasqanyna kózimiz úırenip, etimiz ólip ketti. Sondyqtan da keshegi Memlekettik qyzmet isteri jónindegi agenttiktiń tóraǵasy bolǵan Álıhan Baımenovtiń «Evrıka!» degendeı eldi eleń etkizip, memlekettik ákimshilik qyzmetshilerdiń «A» korpýsyn engizgenine eki jyl tolmaı jatyp, ony jýyrda qaıta qurylǵan Memlekettik qyzmet isteri jáne sybaılas jemqorlyqqa qarsy is-qımyl agenttiginiń sý jańa basshysy Qaırat Qojamjarovtyń mártebeli minberden sileıte synap, múldem joqqa shyǵarǵandaı bolǵanyna onsha qaıran qalǵan joqpyz», - dep jazady Soltústik Qazaqstan oblystyq Tártiptik keńestiń múshesi Káribaı Musyrman «Egemen Qazaqstan» gazetiniń búgingi nómirinde jarııa etilgen «A» korpýsy úmitti aqtady ma?» degen taqyryptaǵy maqalasynda. Avtordyń jazýynsha, el óńirlerindegi atqarýshy bıliktiń negizgi salmaǵy túsetin basshy kadrlardyń ustahanasy bolyp tabylatyn «A» korpýsynyń búgingi jaǵdaıy kóńil kónshiterlikteı emes. Ásirese, testileý qorytyndysy boıynsha bir-eki upaıdy kem alyp, «murttaı ushyp» jatqan tájirıbeli aýdan ákimderinen aırylyp qalǵanymyz qabyrǵany qaıystyrarlyqtaı ókinishti jaıt. Olar ekinshi ret «A» korpýsyna ótýge ótinish berip, tıisti testini abyroımen tapsyryp, qaıtadan bıik laýazymǵa taǵaıyndalǵansha keminde bir jyldaı ýaqyt joǵaltatynyn ómir kórsetip otyr.
***
Osy aptada bir barrel munaı 80-nen 78,67 dollarǵa deıin tómendedi. Bul sonaý 2010 jyly bolǵan kórsetkish. Al maýsym aıynda ǵana, barreli 110 dollardy qurap turǵan munaı baǵasynyń qysqa ýaqyt ishinde osynshalyqty tómen quldılaýyn qalaı túsinýge bolady. Munyń syryn ashýǵa tyrysqan «Aıqyn» gazeti búgingi sanynda «Qara altyn» nege quldyrap barady?» degen taqyryppen maqala jarııalady. Basylymnyń jazýynsha, birinshiden, sońǵy úsh jyl ishinde AQSh-ta taqtatas (slantsy) munaıyn óndirý kólemi kúrt ulǵaıdy. AQSh qazir kúnine 1 mıllıon barrel munaı óndiretin jaǵdaıǵa jetken. Sonyń arqasynda Vashıngton bıyl aldyńǵy orynnan Saýd Arabııasyn yǵystyryp, álemdegi eń iri munaı óndirýshi elge aınaldy. Buǵan qosa, OPEK-ke múshe elder men Reseıdiń munaıyna AQSh-tyń «taqtatas» óndirisi qosylyp, naryqqa shamadan kóp shıkizat shyǵatyn boldy. Osydan kelip óndirýshiler arasynda báseke kúsheıdi, tutynýshyǵa talas bastaldy, baǵa tómendedi. «Ekinshi sebep - suranys azaıdy. Álemde ekonomıkalyq ósim báseńdegendikten, tutynýshylar tartynshaqtap tapsyrys bere bastady.Ekonomıkalyq ósimniń baıaýlaýy ásirese, Eýropada qatty baıqalady. Halyqaralyq valıýta qorynyń (HVQ) málimetine qaraǵanda, Eýroaımaqtaǵy baıaý ekonomıkalyq ósim aldyńǵy eki jyldyq retsessııanyń ornyn toltyra almaı jatyr. Qytaıdyń da qarqyny toqyrańqyrap qalǵan», - dep jazady maqala avtory.
Belgili teatr synshysy Áshirbek Syǵaı artısterdiń oblystarǵa baryp jumys isteýin mindetteý kerektigin aıtyp, depýtattar aldynda málimdeme jasady. Synshynyń aıtýynsha, akterler kemi aımaqtarda eki jyl qyzmet etýi qajet. Bul ári zańmen bekitý kerektigin aıtqan synshyǵa «Aıqyn» gazeti qońyraý shalyp, suhbat alǵan. Basylymnyń saýaldaryna tuşymdy jaýap bergen Á.Syǵaı: «Mádenıet jáne sport mınıstrligine ónerdiń adamdary jańadan kelip jatyr ǵoı. Biraq kóbi mýzykant. Teatrmen tikeleı aınalysatyn teatr óneriniń mamany da departamentke barýy kerek edi. Biraq ony esepke alyp jatqan eshkim joq. Ókinishtisi - osy. 54 teatrdyń qamyn oılaıtyn, ónerge jany ashıtyn adam joq. Atyraýǵa, Qyzylordaǵa, soltústik aımaqtarǵa at izin salmaıdy dep otyra beremiz be, álde bir shara qoldanamyz ba? Meniń kóterip otyrǵan máselem - osy. Jastardy eki-úsh jylǵa elge attandyrý kerek. Sodan keıin ǵana dıplomyn qoldaryna tabys etetindeı jasaýymyz qajet. Dıplomyn alǵan jastardyń kóbi asaba bolyp, telearnalarda qyzmet etip júr. Bul da kerek shyǵar. Al teatrdyń qamyn kim oılaıdy? Pavlodarlyq, atyraýlyq kórermendi kim oılaıdy? Olar kásibı óner-den qur qalýy kerek pe? Sondyqtan jastardy qyzyqtyratyn aıla-tásilder oılap tapqan jón. Baspanasyn sheship, jalaqysyn kóterse, óńirge jastar barmaıdy emes, barady», - deıdi. Suhbat «Jastardy eki-úsh jylǵa elge jiberý kerek» degen taqyryppen berilgen.