A.Eshmuratov: Saılaý - eldegi saıası partııalar júıesi damýynyń jańa kezeńi
«Qazaqstan Prezıdentiniń 20 qańtardaǵy Jarlyǵy álemdegi jáne eldegi ekonomıkalyq ahýalǵa baılanysty qabyldanǵanyn aıta ketken jón. Biraq bul sheshim keleshek jańashyldyqtar men reformalardyń sapaly oryndalýyn kútip otyrǵan Qazaqstan azamattarynyń tilegi negizinde jasaldy. Kóbimiz úshin bul Jarlyq kezdeısoqtyq bolǵan joq. Sebebi bul másele jalpy halyqtyń qyzý talqylaýyna, senimdi qoldaýyna ıe boldy. Jarlyq Konstıtýtsııa men qoldaǵy zańnamanyń aıasynda qabyldandy», - deıdi ol.
A.Eshmuratovtyń aıtýynsha, bul saılaý naýqanynyń erekshiligi sol - QR Parlamenti Májilisindegi úsh partııa fraktsııasynyń bastamasymen kóterildi.
«Bul fakti eldegi saıası partııalar júıesi damýynyń, saıası mádenıettiń jańa kezeńi bastalǵandyǵyn bildiredi. Álemdegi ekonomıkalyq qaýip-qaterler birlesken bastamany kóterýge túrtki boldy. Sondyqtan da bul ortaq úndeý halyqtyń qoldaýyna ıe bolyp, QR Prezıdentiniń Jarlyǵymen zańdy túrde bekidi. Bul - saıası partııalar memleket pen halyq múddesin óz múddesinen joǵary qoıatyndyǵyn kórsetedi. Atalmysh úndeý olardyń saıası jaýapkershiligin bildirse kerek. Bir jaǵynan damýdyń qıyn kezeńinde saılaý ótkizý týraly sheshimdi jarııalaý, árbir saıası partııa úshin taktıkalyq kózqarasyn bildirýdiń úlken múmkindigi», - dep atap ótti saıasattanýshy.
Onyń pikirinshe, kezekten tys saılaý - ekonomıkadaǵy daǵdarys belgilerimen kúresýdiń amaly.
«Elektoraldy naýqandy qazir ótkizip, keıin «Ult Jospary» reformalaryn oryndaýdyń «100 naqty qadamy» baǵdarlamasyna bar ynta-jigermen kirisýge jol ashylady. QR Prezıdenti «Ult jospary - qazaqstandyq armanǵa bastaıtyn jol» atty maqalasynda el damýynyń ózindik kózqarasyn tanystyrdy. Bizdiń qoǵamǵa qazirgi ýaqytta eń basty maqsat - jahandyq qaýip-qaterlerge qısyndy jaýap berý. Onyń saıası jaýaby - Parlament Májilisi men máslıhat depýtattaryn saılaý. Saılaý - halyq múddesiniń ortaq arnaǵa toǵysýy, saıası partııalarǵa senim mandatyn berý», - dedi A. Eshmuratov.
Sonymen qatar, saıasattanýshynyń aıtýynsha, saılaý halyq kemeldenýiniń deńgeıin kórsetedi.
«Biz qoǵamnyń jańǵyrýynyń aldynda turmyz. Biz ózimizdiń qazaqstandyq armanǵa tikeleı bettep kelemiz. Daǵdarys bolsa, kez kelgen ashyq ekonomıkalyq modelde ara-tura oryn alyp turatyn qalypty ahýal. Daǵdarys bizdiń reformalarǵa ózgerister ákelýi yqtımal, biraq olardy toqtatý múmkin emes. Basqa jaǵynan qarasaq, daǵdarys qaı kezde ýshyǵa túsedi?! Oǵan qarsy ne isteıtinin bilmegen kezde. Biz úshin is-qımyl algorıtmi naqty jazylǵan. Bizdiń damý strategııamyz oǵan naqty jaýaptar bere alady. Ult Jospary, «Nurly jol» baǵdarlamasy men QR ÚIIDMB júzege asyrý, barlyq daǵdarystan senimmen shyǵýǵa múmkindik beredi», - dep túıdi sózin A.Eshmuratov.