A.Aıymbetov: Ǵaryshtaǵy bos ýaqytymyzda Betmen sııaqty «ushyp oınadyq»

ASTANA. QazAqparat - 2015 jyldyń 2 qyrkúıeginde «Baıqońyr» aılaǵynan «Soıýz TMA-18M» kemesimen ǵaryshqa ushqan ekspedıtsııa músheleri (keme komandıri S.Volkov, bortınjenerler A.Aıymbetov pen A.Mogensen) halyqaralyq ǵarysh stansasyndaǵy josparly jumysty aıaqtaǵan soń, balasha qýanyp oınaǵan eken. Bul týraly búgin QR Qarýly kúshteri Áýe-qorǵanys kúshterinde ótken kezdesý barysynda jas ushqyshtardyń suraǵyna jaýap bere otyryp, Halyq Qaharmany Aıdyn Aıymbetov aıtyp berdi.

«Halyqaralyq ǵarysh stansasyndaǵy jumysymyzdyń barlyǵy shtattyq kestege saı júrdi. Keıin, bos ýaqytymyz bolǵanda, jumystyń barlyǵyn aıaqtaǵan soń ǵajaıyp dúnıege tań qala, balasha qýandyq. Tipti, teńsizdikte Betmen sııaqty ushýdy úırendik, modýldiń jan-jaǵyn belgilep alyp, kim bıiktik pen teńizdikti ıgere, túzý ushyp shyǵatynyn kórdik. Ǵarysh, árıne, ǵajaıyptarǵa toly», - deıdi A.Aıymbetov. «Buryn ushqan ǵaryshkerler Jer - eń ǵajaıyp jaratylys degende, asyra siltep otyrǵan shyǵar dep oılaıtynmyn, - deıdi ǵaryshker. - Biraq óz kózimmen kórdim ǵoı, bort ıllıýmınatorynan qaraǵandaǵy Jer sharynyń kórinisi sóz jetpes ǵajaıyp». Esterińizge sala keteıik, Aıdyn Aıymbetov - táýelsiz Qazaqstan Respýblıkasynyń ǵaryshqa ushqan alǵashqy azamaty, kosmosty kórgen álemdegi 545-shi ǵaryshker.