92 myń adam jumysynan aıyrylýyna baılanysty tólem aldy

ASTANA. QazAqparat - 2022 jylǵy 1 qarashadaǵy jaǵdaı boıynsha Memlekettik áleýmettik saqtandyrý qorynan (MÁSQ) jumysynan aıyrylýyna baılanysty áleýmettik tólem alýshylardyń sany 92,2 myń adamdy qurady. Bul rette bıyl 87,3 myń adamǵa tólem alǵash ret taǵaıyndaldy, dep habarlaıdy QR Eńbek jáne halyqty áleýmettik qoldaý mınıstrliginiń baspasóz qyzmeti.

Qoldanystaǵy zańnamaǵa sáıkes jumystan bosatylǵan jumyskerler mindetti áleýmettik saqtandyrý júıesine qatysý ótiline jáne sońǵy 24 aıdaǵy tabysyna baılanysty 1 aıdan 6 aıǵa deıin jumysynan aıyrylýy boıynsha áleýmettik tólemder alady. Tólem joǵalǵan kiristiń 40%-yna deıingi mólsherde MÁSQ qarajaty esebinen júzege asyrylady.

Tólem taǵaıyndaý úshin jumystan bosatylǵan jumyskerge:

- eGov.kz portalynda avtorızatsııalaný;

- «Jumysqa ornalastyrý jáne jumyspen qamtý» bóliminde «Jumys izdeýshi adamdardy tirkeý» qyzmetin tańdaý;

- onlaın-qyzmetke tapsyrys berip, barlyq joldardy toltyrý jáne oǵan ETsQ-men qol qoıyp, ótinimdi jiberý qajet;

- bir kún ishinde turǵylyqty jerińizdegi halyqty jumyspen qamtý ortalyǵy (budan ári – HJQO) bos jumys oryndaryn usynady;

- eger jumys tabylmasa, 3 jumys kúni ishinde qashyqtyqtan jumyssyz mártebesi beriledi (qajet bolǵan jaǵdaıda sizge HJQO qyzmetkeri qosymsha aqparat jınaý úshin habarlasady);

Bul qyzmetti onlaın rejıminde Elektrondyq eńbek bırjasy (enbek.kz) arqyly da alýǵa bolady.

Jumyssyz retinde tirkelý týraly málimetter bolǵan kezde Eńbekmıniniń aqparattyq júıesi proaktıvti formatta MÁSQ-tan tólemdi taǵaıyndaý boıynsha qyzmet kórsetýge kelisý úshin mobıldi telefonǵa SMS-habarlama jiberedi. Kelisken jaǵdaıda SMS-habarlamaǵa jaýap berý qajet. Tólem avtomatty túrde taǵaıyndalady.

Esterińizge sala keteıik, MÁSQ qarajaty esebinen jumystan aıyrylǵan jaǵdaıda tólenetin áleýmettik tólem jumystan shyǵý sebepterine qaramastan júzege asyrylady jáne jumyssyz adamdy ol jumys izdegen kezeńde qoldaýǵa arnalǵan.

Memleket basshysynyń osy jylǵy 1 qyrkúıektegi Qazaqstan halqyna Joldaýynda aıtylǵan tapsyrmasyn oryndaý úshin 2023 jylǵy 1 qańtardan bastap MÁSQ-ten jumysynan aıyrylǵan jaǵdaıda tólenetin áleýmettik tólem mólsheri orta eseppen 13% - ǵa ulǵaıtylady. Áleýmettik saqtandyrý júıesin damytýdyń osy jáne basqa da sharalary QR Áleýmettik kodeksiniń jobasynda kózdelgen.

Budan buryn habarlanǵandaı, QR Eńbek jáne halyqty áleýmettik qorǵaý mınıstrligi Elektrondyq eńbek bırjasy arqyly halyqty jumyspen qamtý ortalyqtarynyń qashyqtyqtan qyzmet kórsetý fýnktsıonalyn iske qosty.

Bul jumyssyzdardy tirkeý jáne azamattardyń jumyspen qamtýdy qoldaý boıynsha memlekettik qyzmetterdi, onyń ishinde jumysynan aıyrylý boıynsha áleýmettik tólemderdi alý rásimderin jeńildetýge múmkindik berdi. Endi barlyǵyn tek ınternet, kompıýter jáne elektrondyq tsıfrlyq qoltańba arqyly ǵana jasaýǵa bolady.