9 jasar qazaqstandyq Ispanııadaǵy kásipqoı fýtbol klýbynda jattyǵady
Anasy Alma Іlııasovanyń aıtýynsha, Nazar úsh jasynan Oral qalasyndaǵy FKU Oral (football Kids Uralsk) klýbynda tájirıbeli bapker Bolat Shalaevtyń qolastynda jattyqty.
«Ákesi Sergeı Dolıa ótken jyly jazda Sochıdegi lagerge aparyp edi. Sonda Ispanııadan bapkerler kelip, qaraǵan kezde Nazar birden kózge túsip, unaǵan. Sosyn sertıfıkat berip, Valensııadaǵy fýtbol akademııasyna qaralymǵa shaqyrdy. Qaralymnan oıdaǵydaı ótip, kásipqoı fýtbol klýbymen eki jylǵa kelisimshart jasasty. Jarty jyl Ispanııada bolyp, bir aı demalysyn Oralda, úıde ótkizip, qaıtadan ketti. Óıtkeni kelisimshart boıynsha jattyǵýdy qaldyrmaý kerek. Qyrkúıektiń ortasynan bastap sol eldegi mektepke barady. Ulymmen birge ájesi Gúljamal únemi birge. Men ózim qazaqpyn, ákesi – ýkraın, qarapaıym kóp otbasynyń birimiz», - dedi A.Іlııasova.
Nazardyń fýtbol agenti Marııa Kovalevanyń sózine qaraǵanda, qazaqstandyq balǵyn oıynshy Global Football Total Levante UD akademııasynda qaralymnan oıdaǵydaı ótti. Akademııadan ony Levante UD kásipqoı fýtbol klýby attaı qalap aldy. Endi federatsııa deńgeıinde klýbta aptasyna úsh ret jattyǵatyn bolady. Bul, bir qaraǵanda, azdaý bolyp kórinýi múmkin. Alaıda Ispan eliniń zańdylyǵyna, sondaǵy klýbtardyń qaǵıdatyna sáıkes balanyń júregine kúsh túsirýge, densaýlyǵyna nuqsan keltirýge bolmaıdy. Sosyn ózderiniń fýtbol lıgasynda aptasyna bir oıynǵa qatysady. Olardyń óz chempıonatynda Levante UD klýby absolıýtti jeńimpaz boldy.
«Nazar Global Football Total akademııasynyń bazasynda qaralymnan ótý úshin Ispanııaǵa bıylǵy qańtar aıynyń aıaǵynda bardy. Onda bári de ózgeshe. Bastapqyda munda kelgender tildi bilmeıdi. Basqa orta, tamaǵyna deıin basqa. Ásirese, jattyǵý barysy, oınaý máneri múlde bólek. Sonyń bárine beıimdelip ketý syrttan kelgenderge ońaı emes. Nazar birinshi kúnnen bastap alańda ózin kórsete bildi. Bir apta ótkennen keıin klýb dırektory kelip qarady. Aqyry Nazardyń Levante UD fýtbol klýbyna qabyldanatyny belgili boldy. Sodan keıin aı jarym ýaqyt qujattardy daıyndaýǵa ketti. Sonyń nátıjesinde Nazar lıtsenzııa alyp, tolyqqandy oıynshyǵa aınaldy. Eki jylǵa kelisimshart jasaldy. Munda basqa klýbtar da jas talanttardyń oıynyn qaraıdy, sondyqtan túrli usynystar túsýi múmkin. Nazar qazirdiń ózinde bolashaǵynan úlken úmit kúttiredi, qalǵanyn ýaqyt kórsetedi», - dedi QazAqparat tilshisine Marııa Kovaleva.