9 myń teńgelik kartop pen Afrıkadan jetkizilgen sábiz - óńirlerdegi baǵaǵa sholý
Óńirler boıynsha jınalǵan málimetterge qaraǵanda, eń arzan kartop Taraz, Semeı jáne Pavlodarda. Bul óńirlerde kelisin 100 teńgeden tómen baǵada satyp alýǵa bolady. Máselen, Tarazda bıylǵy kartoptyń ortasha baǵasy 270-290 teńge bolsa, byltyrǵy ónim áldeqaıda arzan — kelisi 60 teńge. Pavlodar men Semeıde byltyrǵy kartop 90 teńgeden, al bıylǵy ónim 230-345 teńgeden satylyp jatyr. Petropavlda kartop 110 teńgeden dúken sóresine shyǵarylǵan. Bul — turaqtandyrý qorynan satylatyn ónimniń baǵasy. Kommertsııalyq maqsatta ótkizilip jatqan kartop quny 230 teńgeden bastalady. Qostanaı, Astana, Qyzylorda, Kókshetaý, Almaty, Jezqazǵan, Qaraǵandy qalalarynyń turǵyndary kartoptyń kelisi úshin 120 teńgeden 200 teńgege deıin tólep otyr. Qostanaıda tómengi baǵa — 126 teńge. Bıylǵy ónim 215 teńge bolsa, iriktelgen kartoptyń kelisi 300 teńgege deıin jetip qalady. 210 teńge jáne odan joǵary baǵa Shymkent, Atyraý, Aqtaý, Túrkistan, Qonaev, Óskemen, Taldyqorǵan, Jezqazǵan, Aqtóbe qalalarynda tirkeldi. Oralda kartop 300 teńge deıin turady. Al, Almaty, Shymkent, Astana qalalaryndaǵy ınternet-dúkender kartoptyń erekshe suryptaryn satady. Frantsııadan jetkiziletin kúlgin tústi kartoptyń kelisi — 2 700 teńge, agat grenaille sorty (Frantsııa) — 8 000-9 200 teńge bolady. Salaýatty ómir saltyn ustanýshylar kartoptyń oryna alyp júrgen batat (tátti kartop) óniminiń kelisi — 1000 teńgeden 8000 teńgege deıin jetedi.
Eń arzan degen sábiz Qyzylorda, Shymkent, Kókshetaý, Astana jáne Almaty qalalarynda — kelisi 150 teńge. Petropavl, Qonaev, Qostanaı, Qaraǵandy, Semeı, Pavlodar, Taldyqorǵan qalalarynda onyń baǵasy 170 teńgeden 200 teńgege deıingi aralyqta tirkeldi. Máselen, Qostanaı oblysynda baǵa 185 teńgeden bastalady. Jýylǵan sábizdiń kelisin 300 teńgege, al «Baltımor» arnaıy sortynyń kelisin 345 teńgeden 435 teńgege deıin satyp alýǵa bolady. Atyraý, Túrkistan, Óskemen, Jezqazǵan, Aqtóbe jáne Aqtaýda sábiz baǵasy 300 teńgege deıin barady, al Taraz jáne Oralda kelisine 300 teńgeden joǵary. Internet-dúkender 200 gramm shamadaǵy erekshe sábizdi 5 700 teńgeden usynyp jatyr. Afrıkadan ákelingen qorapshadaǵy 200 gramm bebı surypyna jatatyn ónim 3 700 teńge turady. Jalpy, bıyl shyqqan sábizdiń kelisi 1 700 teńge bolady.
Pııazdyń kelisine 100 teńgeden tómen baǵa Taraz jáne Qyzylordada tabylsa, al Qaraǵandy, Astana, Shymkent, Semeı, Pavlodar, Almatyda 110-120 teńge turady. Kókshetaý, Qostanaı, Túrkistan, Petropavl, Óskemen, Qonaev, Aqtaý, Taldyqorǵan qalalarynda — 130-150 teńge. 160-170 teńge shamasyndaǵy baǵa Oral, Atyraý, Jezqazǵan, Aqtóbe qalalarynda baıqaldy.
Óńirlerde qyzyl pııazdy 350-500 teńgege satyp alýǵa bolady. Internet-dúkenderde baǵasy 1300 teńge turatyn suryptary da bar. Qabyǵy aq tústi pııaz da arzan emes, kelisi 1 400-1 800 teńgege baǵalanǵan. 250 gramm shamasyndaǵy Frantsııadan jetkizilgen shalot pııazy 1800-2000 teńge, al poreı jýasynyń kelisi — 4000-5500 teńge aralyǵynda.
Ulttyq statıstıka bıýrosynyń málimetinshe, elimizde kartoptyń ortasha quny — 185 teńge, sábiz — 198 teńge, pııaz — 116 teńge. Bul rette, statıstıkalyq derekterde eń qymbat kartop, sábiz jáne pııaz Jezqazǵanda (tıisinshe 275, 287 jáne 192 teńge). Eń arzan kartop Pavlodarda (142 teńge) bolsa, tómen baǵadaǵy sábiz Petropavlda (155 teńge), arzan pııaz Tarazda (97 teńge) ekeni atalyp ótken.