9 mıllıonnan astam saılaý bıýlleteni shyǵarylady - QR OSK
«Búgingi OSK otyrysyna bir másele engizilip otyr. Ol 2015 jylǵy 26 sáýirge belgilengen QR Prezıdentiniń saılaýy jónindegi saılaý bıýlletenderi týraly», - dep otyrysty ashqan QR OSK tóraǵasy Qýandyq Turǵanqulov sóz kezegin komıssııa hatshysy Baqyt Meldeshevke berdi. Óz kezeginde hatshy komıssııa músheleriniń nazaryna 2015 jylǵy 26 sáýirge belgilengen QR Prezıdentiniń saılaýy jónindegi saılaý bıýlletenderi týraly qaýly jobasy usynylyp otyrǵanyn atap ótti. «Qaýly boıynsha, saılaý bıýlletenderin qorǵaý dárejesi osy qaýlyǵa 1-shi qosymshaǵa saı belgilensin. Úshinshi, saılaý bıýlletenderiniń mátini osy qaýlyǵa 2-shi qosymshaǵa saı bekitilsin. Qosymshaǵa saı bıýlletenge engiziletin úmitker kandıdattar: Qusaıynov Ábilǵazy Qalıaqparuly, Nazarbaev Nursultan Ábishuly, Syzdyqov Turǵyn Ysqaquly. Saılaý bıýlletenderi «QR Ulttyq bankiniń banknot fabrıkasy» sharýashylyq júrgizý quqyǵyndaǵy memlekettik kásipornynda daıyndalsyn», - dedi B.Meldeshev. Sonymen qatar ol QR OSK apparatynyń qarjy-baqylaý bólimi saılaý bıýlletenderin oblystyq, Astana men Almaty qalalyq saılaý komıssııalaryna arnaıy baılanyspen 2015 jyldyń 20 sáýirinen keshiktirmeı jetkizýdi, al oblystyq jáne qalalyq komıssııalar bıýlletenderdi aýmaqtyq ýchaskelerge 24 sáýirden keshiktirmeı qamtamasyz etýi tıistigin basa aıtty. QR OSK músheleri qaýly jobasyn biraýyzdan maquldady.