9 mamyrda Qaraǵandy oblysynda soǵys ardageri júz jasqa toldy

QARAǴANDY. QazAqparat – 9 mamyr - Jeńis kúni Qaraǵandy oblysynyń Osakarovka kentinde UOS ardageri Nıkolaı Medvedev 100 jasqa toldy. Ony aýyl turǵyndary, aýdan ákimi Núrken Kóbjanov ǵasyrlyq mereıtoıymen quttyqtady, dep habarlaıdy QazAqparat tilshisi.

Soǵys bastalǵan kezde Nıkolaı Medvedev Almaty temir jol tehnıkýmynyń úshinshi kýrs stýdenti boldy. 1941 jyly tamyzda ol áskerge shaqyryldy. Atys polkindegi jattyǵýlardan keıin maıdanǵa attanǵan. Stalıngrad túbindegi shaıqasta alǵash ret jaýǵa qarsy shyqqan. 43-shi jyly urystardyń birinde snarıad jaryqshaǵy tıip, jaraqat aldy. Gospıtalda emdelgennen keıin áskerge qaıta oraldy.

Kýrskiden Polshaǵa deıin jetken. Jeńisti Berlın mańyndaǵy Gıýstrov qalasynda qarsy aldy. Jaýyngerlik eńbegi úshin Nıkolaı Medvedev Otan soǵysy, Qyzyl Juldyz ordenderimen, «Stalıngradty qorǵaǵany úshin», «Germanııany jeńgeni úshin» medaldarymen marapattalǵan.

Áskerden oralǵannan keıin Osakarov aýdanyna qaıta oraldy. 1946 jyly Pıoner aýyldyq keńesi atqarý komıtetiniń birinshi tóraǵasy bolyp saılandy. Sodan keıin kóp jyl aýdandyq baılanys torabynda jumys istedi.

Ardager jaýyngerlik nagradalaryna qosa «Eren eńbegi úshin», «Tyń jáne tyńaıǵan jerlerdi ıgergeni úshin» medaldaryna qol jetkizdi. 2005 jyly Jeńistiń 60 jyldyǵyna oraı Nıkolaı Medvedevke Osakarovka kentiniń qurmetti azamaty ataǵy berildi.