9 qyrkúıekte Qashaǵan ken ornynan munaı óndirile bastaýy múmkin

ASTANA. 7 qyrkúıek. QazAqparat - Dúısenbi, 9 qyrkúıek kúni Kaspıı qaırańyndaǵy Qashaǵan ken ornynan munaı óndirile bastaýy múmkin. Bul týraly búgin Qazaqstan-Qytaı Іskerlik keńesiniń quryltaıshylyq otyrysynan keıin «QazMunaıGaz» UK Basqarma tóraǵasy Saýat Myńbaev BAQ ókilderine málim etti.

«Óndirý búrsúgini bastalady dep kútýdemiz», - dedi ol.

Esterińizge sala keteıik, shilde aıynda Atyraý oblysyna saparlaǵan QR Munaı jáne gaz mınıstri Uzaqbaı Qarabalın atalǵan jobanyń daıarlyǵy 98 paıyzdy quraıtyndyǵyn atap ótken edi. «Munaı jóneltiletin araldardyń daıarlyǵy jaǵdaıyn qarap kórdik. Óndirýdi qazanda bastaýǵa úmit bar. Budan buryn bolsa, tipti jaqsy. Sonyń barlyǵyn toǵystyryp, jiti jumys jasaý, eshbir qatelikterge urynbaı, birde-bir ret te munaı aǵyp ketýin boldyrmaýymyz qajet. Sondyqtan da jaýapkershilik óte joǵary. Asyǵystyqqa jol bermeý qajet. Sonymen birge merdigerlerdiń de óte belsendi jumys jasap jatqanyn kórip otyrmyz. Jabdyqtardy synaqtan ótkizý nátıjeleri kóńilge senim uıalatady. Bıylǵy jyl biz úshin tabysty bolady, degen senim bar», - degen edi U. Qarabalın.