9 qundyz ishikti Qazaqstanǵa zańsyz kirgizbek bolǵan kelinshek ustaldy
11:56, 04 Qyrkúıek 2019
QORǴAS. QazAqparat - Qorǵasta 9 qundyz ishikti Qazaqstanǵa zańsyz kirgizbek bolǵan 25 jastaǵy kelinshek ustaldy, dep habarlaıdy QazAqparat Ulttyq qaýipsizdik komıtetiniń shekara qyzmetine silteme jasap.
Oqıǵa Qorǵas shekaralyq baqylaý jasaǵynyń jaýapkershilik aýmaǵyndaǵy Halyqaralyq shekara boıy yntymaqtastyǵy ortalyǵynda bolǵan.
«Bólimshe shekarashylary 9 qundyz ishikti elge alyp kirmek bolǵan 25 jastaǵy qazaqstandyq áıeldi ustady. Bul azamatsha kedendik jáne shekaralyq tekserýden ótip bolǵan kezde ustalyp otyr. Zańsyz taýar aktilenip «Altynkól» keden beketine tapsyryldy» delingen habarlamada.
Sonymen qatar, «Aqtaý» shekarashylar kemesi elimizdiń teńizdegi shekarasyn kúzete júrip, teńizden uzyndyǵy 1600 metrlik aý men 800 dana ilmek taýyp aldy. Aýǵa shyrmatylǵan bekire balyqtary qutqaryldy. Memleketke kelýi múmkin shyǵyn - 1 767 500 teńge. Abyroı bolǵanda, onyń aldy alyndy.