9 eldiń shahmatshylary Atyraýda baq synaıdy

ATYRAÝ. QazAqparat– Atyraýda «Atyrau Chess Festival 2022» birinshi halyqaralyq shahmat festıvali ótedi. Bul týraly qazaqstandyq shahmatshy, áıelder arasyndaǵy halyqaralyq grossmeıster, Azııa jáne Álem chempıony Dınara Sádýaqasova baspasóz máslıhatynda málim etti, dep habarlaıdy QazAqparat tilshisi.

Shahmat festıvali erteń, 16 tamyzda bastalady. Oǵan 260 qatysýshy tirkelgen.​ Qazaqstannan basqa AQSh, Nıderland, Lıtva, Ýkraına, Tájikstan, Ózbekstan, Belarýs jáne Reseı eliniń oıynshylary qatysady. Maqsat – Qazaqstanda shahmat oıynyn damytý, salaýatty ómir saltyn nasıhattaý.

«Týrnır túrli elder men jas ókilderiniń basyn qosatyn eleýli oqıǵa bolady dep úmittenemiz. Іs-shara aıasynda árbir shahmat jankúıeri óziniń kúshin «shaıqas alańynda» tájirıbe júzinde synap kóre alady. Festıvaldiń barlyq qatysýshysyna tek sáttilik pen jeńis tileımin», - dedi Dınara Sádýaqasova.

Sondaı-aq Qazaqstan-Brıtan tehnıkalyq ýnıversıtetinen joba aıasynda bakalavrıat pen magıstratýraǵa arnaıy granttar bólinedi. Oıyndy onlaın rejımde​ www.atyrauchessfestival.kz resmı saıtynan kórýge bolady.

Aıta keteıik, halyqaralyq dodanyń júlde qory 13 mıllıon teńgeden asady.