Mektep ashanasynda balalardyń tamaqtan ýlanýyna qatysty 9 aıda 12 qylmystyq is qozǵaldy

<p>ASTANA. KAZINFORM &ndash; Bıyl 9 aıda mektep ashanasynda balalardyń tamaqtan ýlaný faktileri boıynsha 12 qylmystyq is qozǵalǵan. Bul týraly Májilis depýtattarynyń saýalyna Premer-Mınıstrdiń orynbasary Serik Jumanǵarınnyń jaýabynda aıtylǵan.&nbsp;</p>

«Mekteptegi tamaqtaný sapasyna monıtorıng júrgizý maqsatynda Oqý-aǵartý mınıstrliginiń, sanıtarııalyq-epıdemıologııalyq baqylaý organdarynyń jáne jergilikti atqarýshy organdardyń ókilderinen Respýblıkalyq vedomstvoaralyq jumys toby quryldy. Jumys toby apta saıyn nátıjelerdi tyńdap, tıisti sharalar qabyldaýda. Respýblıka óńirlerinde qurylǵan tamaqtaný sapasyn baqylaý jónindegi 222 vedomstvoaralyq saraptamalyq top komıssııalar qyzmetine júıeli monıtorıng júrgizýde. Monıtorıng 6 382 mektep ashanasyn qamtydy. Osy jyldyń 9 aıy boıynsha baqylaý obektilerinde tamaqtan jappaı ýlanýdyń 16 jaǵdaıy tirkelgen. Zardap shekkenderdiń jalpy sany – 722, onyń ishinde balalar – 581 (80,5%). Atalǵan faktiler boıynsha materıaldar qylmystyq qýdalaý organdaryna berildi, 12 qylmystyq is qozǵaldy», - dedi vıtse-premer.

Sonymen qatar ol Mańǵystaý oblysynda balalardyń sapaly tamaqtanýy boıynsha quqyq buzǵany úshin 171 jalpy bilim berý mekemesiniń ákimshiligine tártiptik jaza qoldanylǵanyn atap ótedi. 

«Sanıtarııalyq-epıdemıologııalyq talaptardyń buzylýyna baılanysty keleńsiz oqıǵa bolǵan mektep dırektory jumystan shyǵaryldy. Tıisti emes tamaq jetkizýshisimen kelisimshart buzyldy. Іshki ister organdary ýlaný faktileri boıynsha sotqa deıingi tergeý júrgizýde. Qazirgi ýaqytta Mańǵystaý oblysynyń bilim berý uıymdaryndaǵy epıdemıologııalyq jaǵdaı turaqtandy», - dedi Serik Jumanǵarın.