89,1 paıyzy jınaldy: Aqmola oblysynda eki-úsh kúnde egin oraǵy aıaqtalady
Aqmola oblysy Aýyl sharýashylyǵy jáne jer qatynastary basqarmasynyń málimetinshe, bıyl oblystaǵy egistik kólemi – 5,3 mıllıon gektar. Onyń ishinde 4,9 mıllıon gektarynda dándi jáne dándi-burshaqty daqyldar, 197 myń gektarda maıly daqyldar jáne 223,4 myń gektarda jem-shóp egildi.
«Búginde oblys boıynsha 4 mıllıon 394 myń gektardyń egini bastyryldy. Bul – barlyq egis alqabynyń 89,1 paıyzy. Oblys boıynsha ár gektardan orta eseppen 5,8 tsentnerden astyq jınalyp jatyr», – dep túsindirdi basqarma basshysynyń orynbasary Erkesh Álenov.
Sonymen birge, ol atap ótkendeı, keler jyldyń kóktemgi egisi úshin qajetti tuqym qory da jasalyp jatyr.
«Keler jylǵa jospar boıynsha 536 myń tonna tuqym qajet bolsa, onyń 242 myń tonnasyn nemese 45 paıyzyn qambaǵa quıyp aldyq. Naýqanǵa barlyǵy 8,9 myńnan astam kombaın, onyń ishinde 4,7 myńnan astam birlik qazirgi zamanǵy ónimdiligi joǵary kombaın, 2,6 shalǵy, 4,8 júk kóligi tartylǵan. Egin jınaýǵa memleket tarapynan arzandatylǵan 90,5 myń tonna janar-jaǵarmaı bólindi», – dep tolyqtyrdy Erkesh Álenov.
Sonymen birge, basqarma basshysy egin oraǵy jumystary táýlik boıy júrgiziletinin, túsken astyq elevatorlarǵa jetikiziletinin atap ótti.
«Aýa raıy jaqsy bolyp turǵanda kezde shıraq qımyldap jatyrmyz. Aldaǵy kúnder ashyq bolsa, naýqandy eki-úsh kúnde aıaqtaımyz. Kóktemde ylǵal, jazda jańbyr az boldy. Odan qaldy kıikter shapty, burshaq pen kúzgi jańbyr da biraz qıyndyq týǵyzdy. Qyrkúıek aıyndaǵy jańbyrdan zalal kóp keldi, 2 mıllıon 945 myń gektardyń egini kóktep ketti. Sol úshin úkimet tarapynan 20 myń tonna janar-jaǵarmaı jáne 1 myń tonna gaz bólindi. Qıyndyqtarǵa qaramastan dıqandar bar kúshin salyp jatyr», – dep túıindedi Erkesh Álenov.
Aıta ketsek, budan buryn Aqmola oblysynda aptap ystyq pen jańbyr astyqtyń shyǵymyna keri áser etkendigi týraly jazǵan edik.