84 aýǵan áskerıleri Ózbekstannyń memlekettik shekarasyn kesip ótken

TAShKENT. QazAqparat – 84 aýǵan áskerı qyzmetshisi Ózbekstannyń memlekettik shekarasyn kesip ótti, dep habarlaıdy QazAqparat menshikti tilshisi.

Ózbekstan Respýblıkasy SІM málimetinshe, 14 tamyzda Aýǵanstanmen shektesetin memlekettik shekara ýchaskeleriniń birinde Aýǵanstan Qarýly kúshteriniń 84 áskerı qyzmetshisi memlekettik shekarany kesip ótip, ustaldy. Shekara buzýshylar qarsylyq tanytpaǵan, jaraqat alǵan úsh adamǵa medıtsınalyq kómek kórsetýdi suraǵan.

«Aýǵan azamattary sanıtarlyq-epıdemıologııalyq tekserýden ótkizilip, keıbirine medıtsınalyq kómek kórsetildi. Sondaı-aq, olar tamaqpen qamtamasyz etildi, ýaqytsha jatatyn oryn berildi», - dep habarlady vedomstvodan.

«Termez-Haıroton» kópiriniń Aýǵanstandaǵy bóliginde Aýǵanstan úkimetiniń áskerı qyzmetshileri jınalǵan. Olarǵa gýmanıtarlyq kómek kórsetý sharalary júrip jatyr.

«Ózbekstan SІM aýǵan azamattaryn otanyna qaıtarý jáne «Termez-Haıraton» kópiri aýdanyndaǵy jaǵdaıdy baqylaý boıynsha aýǵan tarapymen kelissózder júrgizip jatyr. Memlekettik shekara kúsheıtilgen rejımde qorǵalyp jatqanyn atap ótken jón. Termezde quramyna qarýly kúshter basshylary men memlekettik organ ókilderi kirgen jedel shtab quryldy», - dep atap ótti Ózbekstan SІM.

Eske salsaq, «Talıban» qozǵalysynyń sodyrlary Aýǵanstannyń mańyzdy ári iri qalalaryn basyp aldy. Halyqaralyq uıymdar dabyl qaǵyp Aýǵanstanda sońǵy 72 saǵatta ondaǵan bala qaza tapqanyn jarııalady.

Sondaı-aq, QR dıplomatııalyq mıssııasy Kabýlda shekteýli quramda jumysyn jalǵastyrýda.