82 jastaǵy zeınetkerdi tonaǵan kúdikti qolǵa tústi

TEMІRTAÝ. QazAqparat – Temirtaýda tanysy zeınetkerdiń bank kartasynan 6 mıllıonnan astam aqsha sheship alǵan, dep habarlaıdy QazAqparat Іshki ister mınıstrligi baspasóz qyzmetine silteme jasap.

Polıtsııaǵa 82 jastaǵy zeınetker belgisiz bireý aqparattyq tehnologııanyń kómegimen bank qosymshasy arqyly esepshotynan 6 mln 175 myń teńge sheship alǵany týraly habarlaǵan. Bul týraly zeınetker bankten esepshotynda aqsha qalmaǵany týraly habarlama kelgende bilgen. Krımınaldyq polıtsııa qyzmetkerleri osy iske qatysy bar degen kúdikpen 24 jastaǵy azamatty ustady.

«Kúdikti zeınetkerdiń tanysy bolyp shyqty. Ol jábirlenýshige únemi kómektesip, dúkenge baryp azyq-túlik alǵan ýaqytta zeınetkerdiń bank kartasy arqyly tólemaqy jasaǵan. Jábirlenýshiniń esepshotyndaǵy aqshany sheship alý úshin basqa shotqa birneshe ret aqsha aýdaryp, keıin ony sheship alǵanyn moıyndady», – dep jazylǵan habarlamada.

Osy oqıǵaǵa baılanysty QK 188-babyna sáıkes qylmystyq is qozǵalyp, tergeý áreketteri júrgizilip jatyr.