81 jastaǵy anasyn qorlaǵan Astana turǵyny qamaýǵa alyndy

ASTANA. QazAqparat - Qart anasyn qorlaǵan astanalyq turǵyn qamaýǵa alyndy, dep habarlaıdy QazAqparat Polisia.kz-ke silteme jasap.

81 jastaǵy keıýana «102» arnasyna habarlasyp, 55 jastaǵy uly úıde janjal shyǵaryp, ózin kemsitip, qorlaǵanyn aıtqan.

«Er adam úıine mas kúıinde kelip, úıde janjal shyǵarǵan. Anasyna balaǵat sózder aıtyp, onyń ar-namysyn qorlaǵan, sol arqyly psıhologııalyq zorlyq-zombylyq kórsetkeni anyqtaldy.

Saryarqa aýdany polıtsııa bóliminiń ýchaskelik ınspektory Ernar Ábdirashev quqyq buzýshyǵa qatysty QR Ákimshilik quqyq buzýshylyq týraly kodekstiń 73-baby 2-bóligi boıynsha ákimshilik hattama toltyrdy.

Ákimshilik quqyq buzýshylyq jónindegi mamandandyrylǵan aýdanaralyq sottyń sheshimimen er adam 7 táýlikke ákimshilik qamaýǵa alyndy», - delingen aqparatta.

Eske salaıyq, 26-28 sáýiri aralyǵynda elorda aýmaǵynda «Quqyqtyq tártip» jedel aldyn alý is-sharasy ótkizilip jatyr.