800-den astam qazaqstandyq stýdent Polshada bilim alyp jatyr - Darhan Myńbaı

ASTAHA. QazAqparat - Búgin Astanadaǵy Ulttyq akademııalyq kitaphanada Qazaqstan halqy Assambleıasy tóraǵasynyń orynbasary Darhan Myńbaı Polsha Respýblıkasy Іshki ister mınıstrligi jáne ákimshiliginiń memlekettik hatshysy - Repatrıatsııa isteri jónindegi komıssar Sebastıan Hvalekpen kezdesti, dep habarlaıdy «QazAqparat» HAA tilshisi.

Kezdesý barysynda Qazaqstan men Polsha arasyndaǵy qoǵamdyq kelisimdi qamtamasyz etý, etnosaralyq qatynastar salasyndaǵy saıasatty jáne ózara is-qımyldy júzege asyrý, qoǵamdyq kelisimdi nyǵaıtýǵa baǵyttalǵan túrli sharalardy birlese uıymdastyrý máseleleri qaraldy.

Darhan Myńbaı sóz basynda eki el arasyndaǵy qarym-qatynastyń joǵary deńgeıin jáne ony ári qaraı damytý qajettiligin atap ótti.

 

«Bıyl eki el arasyndaǵy dıplomatııalyq qarym-qatynastardyń ornaǵanyna 25 jyl tolyp otyr. Osy ýaqyt ishinde barlyq salalarda jaqsy seriktestik qarym-qatynasqa qol jetkizdik. Árıne, olardyń eń mańyzdysy saýda qatynasy men ekonomıkalyq baılanys bolmaq. Munyń barlyǵy memleketter arasyndaǵy tyǵyz baılanystyń ornaýyna septigin tıgizdi», - dep atap ótti ol.

QHA tóraǵasynyń orynbasary búginde elimizde Qazaqstan polıaktarynyń odaǵy jumys istep jatqanyn tilge tıek etti. Atalmysh odaqtyń bólimsheleri respýblıkanyń barlyń óńirlerinde qurylǵan.

«Qazaqstan aýmaǵynda polıaktardyń jeti etnomádenı birlestigi jumys istep jatyr. Qazirgi tańda polıak tili kóptegen mektepterde oqytylýda. 800-den astam qazaqstandyq stýdent Polshada bilim alyp jatyr. Buǵan bilim berý salasyndaǵy yntymaqtastyq týraly úkimetaralyq kelisim yqpal etýde. Biz bul isti odan ári damytýdy kózdep otyrmyz», - dep atap ótti Darhan Myńbaı.

 

Polshanyń ІІM jáne ákimshiligniń bas hatshysy óz kezeginde Qazaqstannyń Polsha úshin mańyzdy seriktesterdiń biri ekendigin atap ótti.

«Bıyl Prezıdenttiń, Senat vıtse-spıkeri men túrli mınıstrlerdiń Qazaqstanǵa sapar shegýi - osynyń aıqyn dáleli. Bilim berý salasynan bólek, ınterpol jelisi boıynsha qaýipsizdik, eki el arasynda jasalǵan kelissózder aıasyndaǵy yntymaqtastyq mańyzdy bolmaq», - dedi Sebastıan Hvalek.

 

Sondaı-aq, Sebastıan Hvalek osy jolǵy saparynda taǵdyrdyń qalaýymen Qazaqstanda ómir súrip jatqan qandastarynyń hal-jaǵdaıyn bilý úshin polıaktar qonystanǵan óńirlerge at basyn buratynyn jetkizdi.

 

Kezdesý sońynda taraptar eki el arasyndaǵy yntymaqtastyqty jandandyrý qajettigi týraly pikirler almasty.