8 tamyzda «Match TV» Denıs Ten týraly arnaıy baǵdarlamany kórsetedi

ASTANA. QazAqparat - 16 jastaǵy Denıs Ten Londonda ótken Olımpıadada erler birinshiliginiń eń jas qatysýshysy jáne Olımpıada fınalyna jetken Qazaqstannyń alǵashqy mánerlep syrǵanaýshysy boldy. Sportshy 2018 jylǵy 19 shildede kóliginiń aınalaryn urlaǵan tonaýshylardyń qolynan qaza tapqan edi.

«Taet led» baǵdarlamasynyń arnaıy shyǵarylymynda Denıs Tenmen jaqyn aralasqan Alekseı ıAgýdın sportshynyń dostarynan, bapkerleri men tanymal syrǵanaýshylardan suhbat aldy. Olardyń qatarynda akter Sanjar Mádı, rejısser jáne stsenarıst Igor Tsaı, mánerlep syrǵanaýshylar Maksım Marının, Tatıana Totmıanına, Maksım Trankov, Tatıana Volosojar, Ilıa Averbýh, Denıstiń alǵashqy bapkeri Elena Vodorezova jáne Denıspen 6 jyl jumys jasaǵan Reseıdiń mánerlep syrǵanaý sportynyń kórnekti bapkeri Tatıana Tarasova boldy.

Elena Vodoroveza bolashaq sportshy bala kúninen mánerlep syrǵanaýdy erekshe unatqanyn aıtty. Denıstiń eń jaqyn dosy, seriktesi ári menedjeri anasy bolǵan edi. Ten árdaıym óz elin maqtan tutty, Qazaqstan halqy mánerlep syrǵanaýdy jaqynyraq tanyp, unatqanyn qalady.

Elena Vodorozeva Denıstiń táýlik boıy jattyǵýdan jalyqpaı, jumys jasaǵanyn, eńbeksúıgishtigin erekshe atap ótti. Ol bar ómirin mánerlep syrǵanaýǵa arnady, áýendi jan-tánimen sezindi.

Tatıana Tarasova Denısti kez kelgen bapker úshin syı dep atady. Onyń syrǵanaýshyǵa degen súıispenshiligi erekshe edi.

«Oǵan bir nárseni qaıtalaýdyń qajeti joq edi, estigenin birden sińirip alatyn» , - dedi Tarasova. Tatıana Anatolevna Denıs qaza tabardan 2 mınýt buryn onyń anasymen telefon arqyly sóıleskenin aıtty.

«Denıs men úshin jaı ǵana syrǵanaýshy bolǵan joq, ol meniń jaqyn dosym edi. Biz jıi sóılesip turatynbyz. Meniń bergen keńesterime únemi qulaq asatyn. Qazaqstanǵa kelgen kezde mindetti túrde kezdesýge tyrysatynbyz. Denıspen qaıǵyly jaǵdaı bolardyń aldynda ǵana sóılesken edik. Men úshin atalmysh baǵdarlamada Denısti eske alý mańyzdy boldy», - dedi Olımpıada chempıony jáne «Taet led» baǵdarlamasynyń júrgizýshisi Alekseı ıAgýdın.

Ilıa Averbýh Denıspen alǵash ret Astanadaǵy Muz shoýynda kezdeskenin aıtty. Sportshy bul sharany Qala kúnine oraı uıymdastyrǵan.

«Denıstiń kez kelgen sózi «rahmet» dep, alǵys aıtýdan bastalýshy edi. Ol meni óziniń tárbıesimen baýrap aldy. Muzda qandaı bolsa, ómirde de dál sondaı edi. Án jazdy, fılm túsirgisi keldi. Shyǵarmashylyq energııasy tasyp turatyn. Oılaǵan armandary mindetti túrde oryndalýshy edi», - dep eske alady Ilıa Averbýh.

Baǵdarlamanyń túsirilimi Máskeýde, Sochıde jáne Almatyda ótti.

8 tamyz kúni saǵat 17.55-te «Match TV»-dan Denıs Tendi eske alýǵa arnalǵan «Taet led» baǵdarlamasynyń arnaıy túsirilimin tamashalańyzdar!