8 óńirde aýyr júk kólikteriniń qozǵalysyna shekteý engiziledi

<p>ASTANA. KAZINFORM - Jyl saıyn kóktem mezgilinde respýblıkalyq mańyzy bar joldardy qystan keıin saqtaý jáne kútip ustaý úshin bir oske júktemesi 8 tonnadan asatyn avtokólik quraldarynyń qozǵalysyn ýaqytsha shekteý engiziledi. Birinshi naýryzdan bastap mundaı erejeler 8 oblystaǵy trassalarda qoldanylatyn bolady.&nbsp;</p>

Atap aıtqanda, Almaty, Atyraý, Jambyl, Ulytaý, Qyzylorda, Mańǵystaý, Jetisý jáne Túrkistan oblystary «Besinshi jol-klımattyq aımaqqa» kiredi. Atalǵan ýaqytsha shekteý sharalary 1 naýryzdan 1 sáýirge deıin qoldanylady.

Shekteý sharalary júkterdi jáne jolaýshylardy halyqaralyq tasymaldaýdy júzege asyratyn, tótenshe jaǵdaılardyń aldyn alý jáne joıý jónindegi is-sharalarǵa tartylǵan, zardap shekkenderge gýmanıtarlyq kómek, azyq-túlik, bagaj, dári-dármek tasymaldaýdy júzege asyratyn, sondaı-aq jol-qurylys jumystarymen aınalysatyn avtokólik quraldaryna qatysty qoldanylmaıdy.

Osyndaı shekteýler 23 naýryz ben 1 mamyr aralyǵynda Aqmola, Aqtóbe, Abaı, Shyǵys Qazaqstan, Batys Qazaqstan, Qaraǵandy, Qostanaı, Pavlodar jáne Soltústik Qazaqstan oblystarynda da engiziletin bolady.