8 óńirde múgedektigi bar balalardy ońaltý ortalyqtary ashylady

NUR-SULTAN. QazAqparat – «Salaýatty ult» ár azamat úshin sapaly jáne qoljetimdi densaýlyq saqtaý» ulttyq jobasy aıasynda 2025 jylǵa deıin múgedektigi bar balalardy ońaltýǵa arnalǵan 8 ortalyq salynady. Bul týraly QR Densaýlyq saqtaý mınıstri Alekseı Tsoı Ortalyq kommýnıkatsııalar qyzmetinde ótken brıfıngide málim etti, dep habarlaıdy QazAqparat tilshisi.

«Ulttyq joba aıasnyda júkti áıelder men balalardyń densaýlyǵyn saqtaý úshin birneshe shara qarastyrylǵan. Birinshiden, júkti áıelderdi bosanǵanǵa deıingi baqylaýmen qamtý kózdelgen. Ekinshiden, 1 jasqa deıingi balalardy proaktıvti baqylaýmen jáne skrınıngtermen qamtamasyz etý qarastyrylǵan», - degen vedomstvo basshysy 8 óńirde balalardy ońaltý ortalyǵy ashylatynyn atady.

«Úshinshiden, 8 óńirde balalardy ońaltýǵa arnalǵan 8 ortalyq jáne 2 erte aralasý ortalyǵyn qosymsha ashý josparlanǵan. Bul múmkindigi shekteýli balalardy medıtsınalyq ońaltýmen qamtýdy 3 ese – 18-den 60% deıin arttyrýǵa múmkindik beredi.

Halyqqa sapaly qyzmet kórsetý kóbinese biliktilikke jáne qajetti mamandardyń bolýyna baılanysty. Sondyqtan ulttyq jobanyń birinshi baǵyty aıasynda asa tapshy mamandyqtar boıynsha rezıdentýralyq bilim berý granttarynyń sany 3800-ge deıin, sondaı-aq álemniń jetekshi ortalyqtarynda qarqyndy terapııanyń halyqaralyq standarttary boıynsha oqytylǵan dárigerler sany kóbeıtiletin bolady», - dedi mınıstr.