8 óńirde Halyqqa qyzmet kórsetý ortalyqtarynyń jumysy kúsheıtildi

ASTANA. QazAqparat – Elimizdiń 8 óńirindegi Halyqqa qyzmet kórsetý ortalyqtarynda jumys rejımi kúsheıtildi, dep habarlaıdy QazAqparat «Azamattarǵa arnalǵan úkimet» memlekettik korporatsııasyna silteme jasap.

«Sheteldikterdiń Halyqqa qyzmet kórsetý ortalyqtaryna jappaı kelýine baılanysty «Azamattarǵa arnalǵan úkimet» memlekettik korporatsııasy Astana, Almaty qalasy, sondaı-aq Qostanaı, Batys Qazaqstan, Soltústik Qazaqstan, Pavlodar jáne Almaty oblystaryndaǵy HQKO-da klıentterdi kúsheıtilgen rejımde qabyldaý týraly sheshim shyǵardy», - delingen korporatsııa taratqan habarlamada.

Málim etilgendeı, kúsheıtilgen jumys rejımine kóshý Jeke sáıkestendirý nómirin (JSN) alýshylar kezegin azaıtýy tıis.

«Shetel azamattary kúsheıtilgen rejımge kóshken 8 óńirdegi Halyqqa qyzmet kórsetý ortalyqtaryna baryp, qajetti qyzmetti ala alady. JSN alý úshin shetel azamattarynan jeke basyn kýálandyratyn qujat talap etiledi. Al qyzmetti alýshynyń resmı ókili júgingen jaǵdaıda, notarıaldy kýálandyrylǵan senimhat jáne ótinishi qajet bolady. Sheteldikter úshin JSN kýáligin berý merzimi – 1 jumys kúni. Qazaqstanda JSN alý barlyǵyna tegin», - deıdi vedomstvodan.

Sondaı-aq memlekettik korporatsııanyń dereginshe, joǵaryda atalǵan 8 óńirden basqa aımaqtardaǵy HQKO jumys ýaqytynda ózgeris joq.

Kúsheıtilgen jumys rejımine kóshken 8 óńirdegi Halyqqa qyzmet kórsetý ortalyqtarynyń mekenjaıy:

• Almaty qalasy, Jetisý aýdany, Qulager sh/a, Serikov k-si, 6A;

• Astana qalasy, Saýran k-si, 7;

• Pavlodar qalasy, Pavlov k-si, 48;

• Oral qalasy, Jambyl kóshesi, 81/2;

• Qostanaı qalasy, Gashek k-si, 14;

• Petropavl qalasy, Áýezov k-si, 157;

• Kókshetaý qalasy, Áýezov k-si, 189a;

• Aqtóbe qalasy, Sańqybaı batyr dańǵyly, 249.