8 mln adamdy deklaratsııadan bosatý mobıldi aýdarymdarǵa qalaı áser etedi

<p>ASTANA. KAZINFORM &ndash; Qarjy mınıstrligi Memlekettik kirister komıtetiniń mamandary jalpyǵa birdeı deklaratsııanyń tórtinshi kezeńin toqtatý mobıldi aýdarymdardy baqylaý erejesine qandaı ózgeris engizetinin túsindirdi.</p>

«100 aýdarym» qaǵıdaty ózgere me?

8 mln qazaqstandyqty jalpyǵa birdeı deklaratsııadan bosatý týraly sheshim «Mobıldi 100 aýdarym» qaǵıdatyn ózgerte me? Qarjy mınıstrliginen taraǵan sońǵy jańalyqtarǵa baılanysty halyq arasynda osyndaı suraq jıi qoıylyp jatyr. Memlekettik kirister komıtetiniń mamandary suraqqa jaýap berdi.

Qoldanystaǵy ereje boıynsha, kásipker retinde tirkelmegen jeke tulǵanyń shotyna qatarynan 3 aıdyń ishinde 100-den artyq aýdarym jasalsa, salyq organy ony kásipker dep tanýy múmkin. Demek, kásipkerlik áreketpen aınalysyp júrmegenine kóz jetkizý úshin óz baqylaýyna alady.

Alaıda bul norma qoldanystaǵy Kásipkerlik kodekske sáıkes emes. Kodekstiń 35-babyndaǵy 2-tarmaqtyń 2-tarmaqshasynda eń tómengi aılyqtyń (85 myń teńge) 12 eselengen mólsherinen asatyn tabys tapqan jeke tulǵany salyq organy dara kásipker retinde tanyp, esepke qoıa alatyny aıtylǵan.

«100 aýdarym» qaǵıdaty men Kásipkerlik kodekstiń talabyn birizdendirý úshin osy 35-baptaǵy 2-tarmaqtyń 2-tarmaqshasyn ózgertip jazý kózdelip otyr.

Onyń jańa redaktsııasy mynandaı bolmaq:

«1 (bir) jeke tulǵanyń qatarynan kúntizbelik 3 (úsh) aıdyń árqaısysynyń ishinde 100 (júz) jáne odan da kóp ártúrli tulǵadan bank shotyna jalpy somasy 3 eń tómengi jalaqydan asatyn aqsha qarajatyn alýy» dep ózgertý usynyldy (2024 jylǵy jaǵdaı boıynsha 3 ETJ - 255 myń teńge)».

Qarapaıym sózben aıtsaq, qatarynan 3 aıdyń ishinde jeke tulǵanyń shotyna 100-den artyq aýdarym jasalsa, ol aýdarymdardyń jıyntyq somasy eń tómengi jalaqynyń 3 eselengen mólsherine teńge bolsa (255 myń teńge) bul shot ıesin salyq organy baqylaýyna alady degen sóz.

«250» normany kimder tapsyrady?

Prezıdent Qasym-Jomart Toqaevtyń aýyl sharýashylyǵy eńbekkerleri forýmynda aıtqan sózinen keıin Úkimet Jalpyǵa birdeı deklaratsııanyń 4-kezeńinde, ıaǵnı 2025 jyldan bastap múlki jóninde memleketke málimet usynýǵa tıis bolǵan 8 mln adamdy deklaratsııa tapsyrýdan bosatý bastamasyn kóterdi.

Qarjy mınıstrligi Premer-Mınıstrdiń osy tapsyrmasyn oryndaý úshin Parlamentke deklaratsııa rásimderin qysqartý týraly usynys ázirlep jatyr.

Ol usynys boıynsha «250.00» nysandy «Aktıvter men mindettemeler» deklaratsııasyn usynýǵa myna sanatqa jatatyn qazaqstandyqtar mindetti bolady:

• shetelde múlki bar QR azamattary men rezıdentter;
• saılanbaly laýazymǵa, memlekettik laýazymǵa ornalasýǵa jáne olarǵa teńestirilgen kandıdattar;
• bankterdiń, baǵaly qaǵazdar naryǵynyń, saqtandyrý uıymdarynyń iri qatysýshysy bolǵysy keletin jeke tulǵalar.

Bul jerde sheteldegi múlik degen uǵymǵa Qazaqstan aýmaǵynan tys jerde tirkelgen jyljymaıtyn múlik jáne kólik, sheteldik bankterdiń shottaryndaǵy 1000 AEK (3,7 mln teńge) astam somadaǵy aqsha, ınvestıtsııalyq baǵaly metaldar, sheteldik kompanııadaǵy qatysý úlesteri, turǵyn úı qurylysyna qatysý úlesi, baǵaly qaǵazdar, týyndy qarjy quraldary, brokerlik shottardaǵy aqsha, zııatkerlik menshik, avtorlyq quqyq obektileri, tsıfrlyq aktıvter, debıtorlyq/kredıtorlyq bereshek quny 1000 AEK (3,7 mln tg) asatyn múlik (antıkvarıat, sándi zattar jáne t.b.) kiredi.

«270» normany kim tapsyrady?

Al jyl saıyn usynylatyn «270.00» nysandy «Kirister men múlikter» deklaratsııasyn myna sanattaǵy azamattar tapsyrýǵa mindetti bolady:

• memlekettik qyzmetshiler jáne olarǵa teńestirilgen adamdar (onyń ishinde kvazımemlekettik sektordyń basshylary men quryltaıshylary) jáne olardyń jubaılary;
• bankterdiń, baǵaly qaǵazdar naryǵynyń, saqtandyrý uıymdarynyń iri qatysýshylary jáne olardyń jubaılary;
• kommertsııalyq uıymdardyń basshylary men quryltaıshylary (qatysýshylary) (AQ-da qatysý úlesiniń (daýys beretin aktsııalardyń) 25% - dan joǵary jáne odan kóp bolsa jáne olardyń jubaılary;
• jeke praktıkamen aınalysatyn adamdar (jekeshe notarıýs, jeke sot oryndaýshysy, advokat, kásipqoı medıator);
• shetelde múlki bar tulǵalar;
• dara kásipkerlik tabysyn qospaǵanda, derbes salyq salynatyn tabys alǵan tulǵalar;
• sheteldik bankterde 1000 AEK astam aqshasy bar tulǵalar;
• Qazaqstanda jáne odan tys jerlerde jıyntyq quny 20 myń AEK-ten asatyn iri múlikti satyp alǵan tulǵalar.

Buǵan deıin habarlanǵanyndaı, qazaqstandyqtardyń bir bóligi deklaratsııa tapsyrýdan bosatyldy.

Qarjy mınıstri Mádı Takıev quny 74 mln teńgeden asatyn aktıv ıelengen azamattar nege deklaratsııa tapsyrýǵa mindetteletinin túsindirgen bolatyn. Sondaı-aq mınıstr jalpyǵa birdeı deklaratsııanyń sońǵy kezeńin toqtatý iri sheneýnikterdiń múlkin jasyrýǵa múmkindik ashady deıtin syndarǵa jaýap berdi.