8 maýsymnan bastap Petropavldan Reseıge elektr poıyzdary qatynaıdy
Soltústik Qazaqstan oblysynyń jolaýshylar kóligi jáne avtomobıl joldary basqarmasynyń málimetinshe, 2020 jyldyń 17 mamyry kúni pandemııaǵa oraı Reseımen baılanystyratyn Petropavl-Makýshıno, Petropavl-Esilkól baǵytyndaǵy elektr poıyzdarynyń qozǵalysy toqtatyldy.
Endi 8 maýsymnan bastap olardyń qozǵalysy qaıta qalpyna keltirilmek. Tıisti sheshim qabyldandy.
«2021 jyldyń jeltoqsan aıynda biz kelisimshart jasastyq. Konkýrsta jańa tasymaldaýshy jeńiske jetti. Ol Nur-Sultan qalasynan «Lıder-elektroservıs» JShS-i. Kompanııa «Reseı temir joldary» AQ barlyq tıisti kelisimshartqa otyrdy. Óıtkeni bar ınfraqurylym jalǵa alynady, «Qazaqstan temirjoly» óziniń jyljymaly quramyn bul jerde - Petropavlda qoldana almaıdy. Turaqty tok jáne aýyspaly tok degen túsinik bar. Turaqty tok tek reseılik jyljymaly quramǵa ǵana qoldanylady», - deıdi SQO jolaýshylar kóligi jáne avtomobıl joldary basqarmasy basshysynyń orynbasary Mırhat Ábilmájinov.
Bılet quny turǵyndardyń qaltasyn qaqpaýy úshin bıyl bıýdjetten elektr poıyzdaryn sýbsıdııalaýǵa qarjy bólindi. Ol shamamen 250 mln teńge.
ıAǵnı bılet quny ózgerissiz qalmaq. Qajet bolǵan jaǵdaıda qosymsha qarajat ta bólinedi.
«Turǵyndardan osy baǵyttarǵa elektr poıyzdaryn jiberýdi suraǵan ótinish óte kóp tústi. Kópshilikke ol jaqyn mańdaǵy eldi mekenderden oblys ortalyǵyna jumysqa jetýge yńǵaıly. Sondaı-aq Reseıdegi týǵan-týystaryna da baryp-kelýge kóliktiń osy túrin tańdaıdy. Elektr poıyzdarynyń júrý kestesi jáne jolaýshylar bıletiniń baǵasy ózgermeıdi. Áleýmettik mańyzdy tarıf saqtalady. Bul baǵyttarǵa kúndelikti júredi, máselen Esilkólge kúnine eki ret elektr poıyzy barady. Al Makýshınoǵa táýligine bir ret elektr poıyzy jolǵa shyǵady, tańerteń oblys ortalyǵynan shyǵyp, keshke qaıtyp keledi», - deıdi Mırhat Ábilmájinov.