8 balany «Altyn alqanyń» aqshasyna asyrap keldik - astanalyq kópbalaly ana

NUR-SULTAN. QazAqparat - «Altyn alqa» ıegeri Ásel Ábisheva buǵan deıin 8 balasyna járdemaqy retinde 16 360 teńge ǵana alyp kelgen. Elordalyq kópbalaly ana QazAqparat tilshisine ataýly áleýmettik kómek taǵaıyndaý sharttary jeńildegennen beri ómirinde qandaı ózgerister bolǵanyn aıtyp berdi.

Ásel Ábishevanyń 8 balasy da áli kámelettik jasqa tolmaǵan. Soǵan qaramastan, osy kúnge deıin memleketten járdemaqy retinde tek «Altyn alqa» ıesine beriletin 16 360 teńge alyp kelgen. Ataýly áleýmettik kómek berý sharttaryna engen ózgeris astanalyq ananyń ómirine jańa úmit syılapty.

«Segiz balanyń jeteýi qyz, besinshi balamyz ǵana ul. Úlkeniniń jasy 14-te. Al kenjemiz bir jasqa jańa toldy. Osylardy aman-esen ósirý úshin úıde otyryp ta jumys isteımiz. Qujattarymdy tolyq ótkizdim. Ár balaǵa 21 myń teńgeden tólenetinin estip qýanyp otyrmyz. Eldiń demografııasyna aıtarlyqtaı úles qosyp jatqanymyzdy shyn máninde sezine bastaǵandaımyz. Balalardyń erteńine degen úmit oıandy. Ár balanyń rızyǵy ózinde bolǵanyna ne jetsin» - deıdi Ásel Ábisheva.

Eske sala keteıik, buǵan deıin Eńbek jáne halyqty áleýmettik qorǵaý mınıstrligi Qazaqstan boıynsha 84 287 otbasy jańartylǵan formattaǵy ataýly áleýmettik kómek ala bastaǵanyn habarlaǵan bolatyn.