8 bala tárbıelep otyrǵan áskerı qyzmetker

QYZYLORDA. QazAqparat - Qyzylordalyq Qonysbek Bedelbekuly elimizdiń qorǵanys salasynda 2008 jyldan beri qyzmet atqaryp keledi. Sondaı-aq ol otbasynda segiz perzent tárbıelep otyrǵan úlgili shańyraq ıesi atanyp otyr, dep habarlaıdy QazAqparat tilshisi.

Qonysbek Bedelbekuly Qyzylorda qalasyndaǵy Ulttyq ulannyń №5547 áskerı bóliminiń áskerı qyzmetshisi. 2008 jyldan beri qorǵanys salasynda jemisti eńbek etip keledi. Búginde áskerı bólimde qaraýyl bastyǵy-bólinis bastyǵy qyzmetin atqarady. Onyń jalpy eńbek ótili 21 jyldy quraıdy. Óz qyzmetinde mol tájirıbe jınaqtaǵan ol basshylyq tarapynan oń baǵalanady. Qonysbek qyzmette senimdi dos, bedeldi áriptes.

«Áskerı sala únemi jaýapkershilikti qajet etedi. Sondyqtan árdaıym Otan qorǵaý jolynda kirpik qaqpastan qyzmet etip kelemiz. Azamattyq boryshyn óteýge kelgen jas jaýyngerlerge aqyl-keńesimizdi aıamaımyz. Olarǵa áskerı ómirdiń qyr-cyryn úıretemiz», - deıdi ol.

Sondaı-aq ol otbasynda úlgili áke. Jary Aızat Nurymbetova ekeýi segiz balany tárbıelep otyr. Olardyń Zamanbek, Aqbota, Aqzere, Sanjar, Mereke, Zınnur, Aısha, Ásııa ul-qyzdary ósip keledi.

Jubaıy Aızat Ábdiqaıyrqyzy Qyzylorda oblystyq týbdıspanser ortalyǵynda medbıke bolyp jumys jasaǵan. Qazir úı sharýasynda, balalardyń tárbıesimen aınalysady. Ardaqty ana «Kúmis» jáne «Altyn alqa» ıegeri.

«Beıbit kúnniń tynyshtyǵy biz úshin árdaıym qymbat. Sol jolda tynbaı eńbek etip kelemiz. Árbir araılap atqan tańnyń baǵasy ólsheýsiz. Sondyqtan árbirimiz týǵan elimizdiń beıbitshiligi úshin tileýles ekenimiz belgili», - deıdi ol.

Ónegeli otbasy 2018 jyldyń jeltoqsan aıynda «Áskerı baspana» baǵdarlamasy arqyly 4 bólmeli páterge ıe bolǵan.