8 aıda memlekettik bıýdjet 5 trln teńgeden asa salyq túsimderimen tolyqty
«Bıylǵy qańtar-tamyz aılarynda memlekettik bıýdjetke salyq túsimderi boıynsha jospar 91,4%, onyń ishinde respýblıkalyq bıýdjet 80,9% jáne jergilikti bıýdjet 116,4% atqaryldy. Esepti kezeńde memlekettik bıýdjetke túsken salyq túsimderi ótken jyldyń uqsas kezeńine qaraǵanda 11,1%-ǵa (nemese 646,7 mlrd.teńgege) tómendeýmen 5 158,3 mlrd teńgeni qurady. Onyń ishinde respýblıkalyq bıýdjet boıynsha 24,4 paıyzǵa (nemese 1 037,6 mlrd teńgege) kemidi, jergilikti bıýdjet boıynsha 25,1 paıyzǵa (nemese 390,9 mlrd teńgege) ósti», - delingen QR QM Memlekettik kirister komıteti baspasóz qyzmetiniń málimetinde.
Tómendeýdiń sebebi syrtqy jáne ishki faktorlarǵa baılanysty ekonomıkalyq ahýaldyń nasharlaýy bolyp otyr.
2019 jyldyń uqsas kezeńimen salystyrǵanda negizgi eksporttyq pozıtsııalarǵa, onyń ishinde munaıǵa 36,5%, myryshqa 18,3%, alıýmınııge 10,9%, qorǵasynǵa 9,3%, mysqa 5,9% baǵanyń tómendeýi baıqalady.
«2020 jylǵy 8 aıda úshinshi eldermen taýar aınalymy 11,9 paıyzǵa azaıdy (eksport 15,4%-ǵa, ımport 4,5%-ǵa). Onyń ishinde taýar aınalymynyń 20,7 paıyzǵa tómendeýi aǵymdaǵy jylǵy tamyzǵa kelip otyr (eksport 34,9%-ǵa azaıdy, ımport 3,7%-ǵa ósti)», - dep atalyp ótken vedomstvo habarlamasynda.
Bıylǵy 8 aıda jergilikti bıýdjetke túsetin salyq túsimderi boıynsha jospar 275 mlrd teńgege artyq, 116,4% -ǵa oryndaldy.
Jergilikti bıýdjet josparynyń artyǵymen oryndalýyna korporatıvti tabys salyǵynyń jergilikti bıýdjetke berilýi áser etti.