76 jyl ótkennen keıin tabylǵan jaýynger súıegi Kókshetaýda jerlendi
Eske sala keteıik, osydan birer kún buryn Ekinshi dúnıejúzilik soǵys kezinde habarsyz ketken qazaqstandyq sarbaz Ábilqasym Jamanbaevtyń súıegi tabylǵan bolatyn. Jumysshy-sharýa qyzyl áskeriniń quramynda bolǵan otandasymyzdyń súıegin reseılik izdestirýshiler Gaıtolovo Lenıngrad oblysynyń Kırov aýdanyndaǵy izdeý jumystary kezinde Gaıtolova derevnıasynyń mańynan tapqan. Onyń qarý-jaraqtary men turmystyq zattary da sol jerden tabylǵan. «Tabystyrý» izdeýshiler jasaǵynyń komandıri Sergeı Barsýkovtyń deregi boıynsha, jaýyngerdiń Ábilqasym Jamanbaev ekenin onyń moıyn tumarynda jazylǵan jazýdan anyqtaǵan. Onda 1914 jyly Kókshetaý oblysy Chıstopol aýdanynyń Garshıno aýylynda týǵan Ábdilqasym Jamanbaev dep jazylypty.
Ardager soǵystyń alǵashqy kúnderi 1941 jyldyń 18 shildesinde sol kezdegi Kókshetaý oblysynyń Rýzaev aýdandyq áskerı komıssarıatynan áskerge alynyp, 1942 jyldyń aqpanynan bastap iz-túzsiz joǵalǵandar tizimine qosylypty. Ákesi, odan keıin óziniń urpaqtary osy kúnge deıin izdeýmen kelgen.
«Atam Ábilqasym soǵysqa attanǵanda meniń ákem Qaıdar nebary 4 jasta bolatyn. Habarsyz ketken atamyzdyń súıegi tabylatynan ákem Qaıdar úmittengen edi. Búgin sol úmit oryndalyp, atamyzdyń súıegin týǵan eline jerlep otyrmyz»,-dep atap ótti nemeresi Qanat Jamanbaev.
Búgin 9 mamyr - Jeńis kúni jerles jaýyngerdiń súıegi Kókshetaýdaǵy musylmandar zıratyna jerlendi. Marqumnyń arýaǵyna quran oqylyp, duǵa baǵyshtaldy.
Aıta keteıik, jaqynda soǵysta habarsyz ketken taǵy bir aqmolalyq jaýynger, Esil aýdany Terisaqqan aýylynyń týmasy Kenjebek Boltaevtyń súıegi Reseıdiń Lenıngrad oblysynan tabylǵan bolatyn. Ony 2018 jyldyń 3 mamyrynda Kırov aýdany aýmaǵyndaǵy orman alqabynda júrgizilgen «Poreche-2018» ekspedıtsııasy barysynda «Sosnovyı bor» izdestirý jasaǵynyń sarbazdary taýyp alǵan edi.
Jaýyngerdiń esimi sol jerden tabylǵan tósbelgiden anyqtaldy. Іzdestirýshiler ondaǵy jazýdyń boıaýy ketkenine qaramastan, «Boltaev Kenjebek, 1910 jyly týǵan» degen jazýdy oqyǵan. Sonymen qatar, tósbelgide: «Kazahskaıa ASSR, Akmolınskaıa oblast, Esılskıı raıon, Tersokanskıı selskıı sovet, selo Tersokan», dep jazylǵan. Al, «týystary» degen grafada ákesi «Boltaev Jantas» dep kórsetilgen. Osydan-aq, Kenjebek Boltaevtyń sol kezdegi Qazaq ASSR Aqmola oblysynyń Esil aýdany (búgingi tańda Jaqsy aýdanyna qaraıdy) Terisaqqan aýylynyń týmasy ekenin birden ańǵarýǵa bolady.
Qazirgi kezde reseılik tarap jaýyngerdiń týystaryn anyqtap, súıegin týǵan jerine jóneltý jaıyn qarastyryp jatqan kórinedi.