782 mln: Eriktiler bıýdjet qarajatynyń negizsiz jumsalýyna jol bermedi

<p>2023 jyly jemqorlyqqa qarsy volonterler 782 mln teńge somasyna baǵany kóterý táýekelderin boldyrmady, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;&nbsp;</a></p>

Sybaılas jemqorlyqqa qarsy is-qımyl agenttigi Mańǵystaý oblysynyń bıýdjetine shamamen 200 mln teńge qaıtarylǵanyn málim etti. Atap aıtqanda, osy jyldyń qazan aıynda «Kaspıı jylý, sý arnasy» MKK (Aqtaý q.) 247 mln teńge somasyna «úsh tizbekti stantsııanyń» 1 birligin satyp alýdy josparlaǵan. Bul rette júrgizilgen taldaý naryqtyq baǵa shamamen 50 mln teńge ekenin kórsetti. Tıisti jumystyń nátıjesinde taýardyń quny 49 mln teńgege deıin tómendetildi.

Osy jyldyń qarasha aıynda Almaty qalasynda orta mektep jalpy quny 12,5 mln teńgege 25 kompıýter satyp alýdy josparlaǵan, ıaǵnı birlik úshin – 500 myń teńge. Alaıda monıtorıng barysynda tehnıkalyq erekshelik boıynsha qolaıly monobloktyń quny shamamen 315 myń teńge ekeni anyqtaldy. Qorytyndysy boıynsha satyp alý toqtatylyp, jaýapty tulǵalar tártiptik jaýapkershilikke tartyldy. Atyraý oblysynda eriktiler jumysynan keıin Qyzylqoǵa aýdanyndaǵy Mádenıet úıi jetkizýshiler arasyndaǵy básekelestik sharttarynyń buzylýyna baılanysty 5,3 mln teńgege kartınalar satyp alýdy toqtatty.

Memlekettik satyp alýlardy taldaýdan basqa, volonterlerdiń edáýir bóligi áleýmettik nysandar qurylysynyń barysyn monıtorıngileýge jumyldyrylǵan. Aqmola oblysynda Bulandy aýylynda mektep salý monıtorınginiń qorytyndysy boıynsha jalǵaý toraptarynyń buzylýy jáne shatyrdyń aǵash konstrýktsııalaryn otqa tózimdi óńdeýdiń bolmaýy anyqtaldy.

Memlekettik sáýlet-qurylys baqylaý basqarmasynyń tekserý nátıjeleri boıynsha QNjE buzýshylyqtary jáne jobalyq sheshimnen aýytqýlar anyqtaldy. Merdigerge buzýshylyqtardy joıý týraly nusqama berildi jáne ÁQBtK-niń 312-baby boıynsha hattama toltyryldy.

Almaty oblysynda ákimdik belgilengen merzimde «Jasyl el» baǵdarlamasyna qatysqan 1200 stýdentke eńbekaqy tólemegen. Eriktilerdiń aralasýynan keıin stýdentterge 133,9 mln teńge somasy tólendi.

Shymkent qalasynda monıtorıngtik toptyń kásipkerlik sýbektilerine zańsyz barýy toqtatyldy. Densaýlyq saqtaý basqarmasynyń basshysy jeke medıtsınalyq uıymdardyń monıtorıngi boıynsha negizsiz buıryq shyǵarǵan. Ýaqytyly áreket etý nátıjesinde buıryq joıyldy. ShQO eriktileri Altaı aýdanyndaǵy «Qazmyrysh» JShS taý-ken baıytý kesheniniń janynda «Zelenka» ózeniniń lastaný faktilerin anyqtady.

Sybaılas jemqorlyqqa qarsy qyzmet oblystyń Ekologııa departamentimen ekologııalyq normalardyń talaptaryn saqtaý máseleleri boıynsha tekserý júrgizýge bastamashylyq jasady. Sonymen qatar volonterlik aıasynda kásibı zańgerler, advokattar 9 myńnan astam azamatqa quqyqtyq keńes berdi. Jobanyń maqsaty – jemqorlyqqa qarsy is-qımylǵa belsendi azamattardy, memlekettik organdardy, kvazımemlekettik sektordy jáne qoǵamdyq birlestikterdi tartý.