75 jastaǵy Qubaıdolla 10 túrli ónertabysqa patent aldy - sheteldegi qazaq baspasózi
Dımash Qudaıbergen Stambýlda 12 tilde án shyrqady - TRT
Qazaqstannyń halyq ártisi, ánshi Dımash Qudaıbergen Stambýlda jankúıerlerimen kezdesti. Dımash Qudaıbergen qazaq, orys, mandarın, aǵylshyn, frantsýz, ıtalıan, ýkraın, túrik, serb, qyrǵyz, nemis, ıspan tilderinde án shyrqady, dep habarlaıdy Túrkııa Radıo Televızııa portaly.
Áıgili ónerpaz Dımash Qudaıbergen kontsertte óziniń tanymal ánderin aıtqan.
30 jasqa tolǵan Qudaıbergenniń 15 jasynan ustazy bolǵan Marat Áıtimov sahnada aq tilekterin aıtyp, týǵan kúnin atap ótti.
Túrkııalyq BAQ-tyń keltirgen málimetine súıensek, Dımash jalǵyz tilegin aıtty: "Aıyrmashylyǵymyz qıyndyq týdyrmaıdy. Bir aspannyń astynda ómir súrip jatyrmyz. Bárimizdi bir Alla jaratty. Soǵyssyz dúnıe tileımin. Balalar jylamasyn. Bir-birimizdi qurmetteıik jáne bir-birimizdi súıeıik».
Sondaı-aq, Dımash osy kontsertke sebepker bolǵan jankúıerlerine alǵysyn bildirgen.
«Óner jolynda 2 stýdııalyq albom, 40 sıngl jazdyrǵan Qudaıbergen qazaq, orys, mandarın, aǵylshyn, frantsýz, ıtalıan, ýkraın, túrik, serb, qyrǵyz, nemis, ıspan tilderinde án shyrqady», dep jazdy TRT.
Altaı - adamzat shańǵy tebýiniń bastalǵan jeri - «Halyq gazeti»
Bul - Shyńjańnyń Altaı aımaǵy Dóńdibulaq úńgirindegi jartas sýreti. Ejelgi Altaı halqynyń shańǵymen ań aýlaý kórinisin shynaıy beınelegen. Adamzattyń eń alǵash shańǵymen syrǵanaýyn estelikke alǵan jádiger. Zertteýlerge sáıkes, bul sýret 12000 jyl buryn salynǵan. Sondyqtan Altaı «adamzattyń alǵash shańǵy tepken jeri» dep jarııalandy dep habarlaıdy Qytaıdyń «Halyq gazeti».
Qytaılyq basylymnyń keltirgen derekterine súıensek, adamzattyń alǵash shańǵy tepken jeri Altaı — soltústik endiktiń 45 gradýsyndaǵy «altyn qar beldeýine» ornalasqan. Bul Qytaıdaǵy eń uzaq qar jaýatyn aımaq. Jyl boıy 210 kún qar jamylady, 170-180 kún qar jaýady. Taýdaǵy qardyń ortasha qalyńdyǵy 2 metrge jetedi.
Munda ómir súrgen ata-babalar qundy mura qaldyrdy. Olar jergilikti materıaldardy paıdalanyp, iri jylqy sıraǵynyń terisin tańdap, mólshermen uzyndyǵy 180 sm, eni 10 sm bolatyn, aldyńǵy jaǵy qaıqy aǵash taqtadan shańǵy jasaǵan. Betkeıge shyqqanda jylqy túginiń jartysy keri baǵytta bolady, sol arqyly úıkelisti arttyryp, taıýdyń aldyn alady eken. Eńiske syrǵanaǵanda teridegi túktiń jartysy oń baǵytta bolady. Syrǵanaǵanda úıkelis azaıyp, jyldamdyq artady. Tek bir qar taıaqshasymen shańǵy teýip, ań aýlaýǵa bolady
«Ýaqyt syrǵyǵanymen, ejelgi jún-terili shańǵy tarıh sahnasynan alystaǵan joq. Olar Altaı halqynyń kúndelikti júris-turysynda óz rólin jalǵastyryp keledi, sondaı-aq shańǵy jarystarynda jıi kezdesedi», dep jazdy «Halyq gazeti».
Sonymen qatar osy aptada «Halyq gazeti» basylymynda «Astana - Úrimji baǵytyndaǵy reıs sany artyp keledi» degen taqyryptaǵy aqparat jaryq kórgen bolatyn.
Qytaılyq basylym bul aqparatyn QR Kólik mınıstrligine silteme jasap habarlaǵan. Atap aıtqanda, QR Kólik mınıstrligi halyqaralyq reıster sanyn ulǵaıtý jáne ushý geografııasyn keńeıtý boıynsha jumys jalǵasyp jatqanyn málimdedi.
2024 jylǵy 30 mamyrdan bastap «China Southern Airlines» áýe kompanııasy Astana – Úrimji baǵyty boıynsha reıster sanyn aptasyna 2-den 3 reıske deıin arttyrýdy josparlap otyr. Reıster Boeing 737 (syıymdylyǵy 128-den 178 orynǵa deıin) ushaqtarynda oryndalady.
Qazaqstan men Qytaı arasyndaǵy reıster sanynyń artýy elder arasyndaǵy týrıstik, mádenı, ınvestıtsııalyq jáne iskerlik yntymaqtastyqty odan ári damytýǵa, sondaı-aq halyqaralyq áýe tasymaly naryǵyndaǵy básekelestiktiń artýyna jáne áýe bıletteri baǵasynyń tómendeýine yqpal etedi.
Qazaqstan Májilis tóraǵasy Iran prezıdentiniń qaıtys bolýyna baılanysty Tegeranda kóńil aıtý jáne qurmet kórsetýge qatysty - Parstoday
Qazaqstan Májilis tóraǵasy Erlan Qoshanov Iran prezıdenti Ibragım Raısıdiń qaıtys bolýyna baılanysty Tegeranda kóńil aıtý jáne qurmet kórsetýge arnalǵan is-sharaǵa qatysty.
Bul týraly Irannyń «Parstoday» aqparat agenttigi de habarlady.
Atalǵan basylymnyń keltirgen málimetine súıensek, 22 mamyr kúni Iran halqy tik ushaq apatynan qaıtys bolǵan Prezıdent Ibrahım Raısımen qoshtasty. Prezıdentter saraıynda ótken kóńil aıtý jáne qurmet kórsetýge arnalǵan is-sharaǵa Qazaqstan delegatsııasyn Májilis tóraǵasy Erlan Qoshanov bastap bardy.
«Palata spıkeri Iran Islam Respýblıkasy vıtse-prezıdenti Mohsen Mansýrımen jáne memlekettiń joǵary saıası basshylyǵymen kezdesip, Qazaqstan Prezıdentiniń atynan búkil Iran halqyna, sondaı-aq qaza tapqan adamdardyń otbasylaryna kóńil aıtty», - dep jazdy ırandyq BAQ.
75 jastaǵy Qubaıdolla 10 túrli ónertabysqa patent aldy – «Altaı aqparaty»
Qytaıdyń Altaı aımaǵy Qaba aýdanyna qarasty Jaıylma qalashyǵy Qaraǵash aýylynda turatyn Qubaıdolla Manapulynyń úıiniń aýlasyndaǵy tájirıbelik bazasynan «tikushaq» jáne «globýs» sııaqty san alýan úlgilerdi kórýge bolady, dep habarlaıdy «Altaı aqparaty».
Qytaılyq basylymnyń dereginshe, 75 jastaǵy Qubaıdolla Manapuly - Jaıylma qalashyǵy Qaraǵash aýylynyń qarapaıym sharýasy, ol kúndelikti jumys kezinde kóp oılanǵandy jaqsy kóredi. Onyń ónertabystarynyń kópshiligi fermerlerdiń ómirimen tyǵyz baılanysty bolǵandyqtan Q. Manapulyn jurt «halyq ónertapqyshy» dep ataıdy.
Atap aıtqanda «Dınozavr» atty tikushaq úlgisin ózi jasap, dánekerlep, qurastyrǵan.
«Qarańyz, mynaý ózim jobalap, dánekerlep qurastyrǵan tikushaq modeli, buny jaı ǵana model dep oılap qalmańyz, bul usha alady. Sondaı-aq globýs ta bar, osyny jasaý úshin 5000 metr sym temir qoldandym. Sondyqtan gınnes rekordtyna ótinish bermekshimin», - deıdi Qubaıdolla Manapuly.
Qubaıdolla Manapuly 2005 jyly malǵa arnalǵan jyljymaly emdik vannany jasap shyǵardy jáne ulttyq patent aldy. Qoldaný barysynda ol malǵa arnalǵan jyljymaly vannanyń qýat júıesiniń aqaýlary bar ekenin anyqtady. Osy kemshilikterge jaýap retinde ol kóptegen transformatsııa synaqtarynan keıin 2008 jyly jyljymaly jańa emdik vannany sátti jasap, osy ulttyq patentti qaıtadan alǵan.
Qubaıdolla munymen toqtap qalmaı, aýyldy kórkeıtýge, eginshiler men malshylardyń kúndelikti qajettilikterine súıene otyryp, jınalmaly ashana ústelderin, jınalmaly kıim ilgishterdi jáne basqa da kóptegen jańa arnaıy ónimderin jasap shyqqan. Bul tapqyrlyqtary ártúrli aýqymdy kórmelerge birneshe ret qatysýǵa shaqyryldy jáne onyń jumystary kórermenderdiń ystyq yqylasyna ıe bolǵan.
«Men aldaǵy ýaqyttarda bul ónertabystarymnyń prıntsıpterin, óndirisi men paıdalaný ádisterin jazyp, qoǵamǵa nasıhattaýǵa jáne aýyl turǵyndarynyń ómirine kóbirek qolaılylyq jasaýǵa tyrysamyn», - deıdi Qubaıdolla Manapuly.
Ózbekstan Parıjdegi Olımpıadaǵa daıyndyqqa qansha qarjy jumsady - «ÓzA»
2024 jyldyń alǵashqy shıreginde Parıj-2024 Olımpıada oıyndaryna daıyndyq úshin 73 mıllıard 355 mıllıon 700 myń sým kóleminde qarajat jumsalǵan. Ulttyq Olımpıada komıtetiniń (UOK) aqparatyna sáıkes, bul qarjy Olımpıadaǵa daıyndalyp jatqan 20 sport federatsııasy men qaýymdastyqtar bergen ótinim negizinde jergilikti jáne halyqaralyq oqý-jattyǵý jıyndaryna bólingen, dep habarlaıdy ózbekstandyq «ÓzA» aqparattyq agenttigi.
Habarda aıtylýynsha, «Ózbekstan sportshylaryn 2024 jyl Parıjde (Frantsııa) ótetin HHHІІІ Jazǵy Olımpıada jáne XVII Paralımpıada oıyndaryna jan-jaqty daıyndaý týraly» Prezıdent qaýlysyna sáıkes ÓR Sport mınıstrligi, Ulttyq Olımpıada komıteti federatsııalar jarysqa júıeli túrde daıyndalýda.
Atalǵan BAQ-tyń dereginshe, sonymen qatar, olımpıadalyq sport túrleri boıynsha federatsııalar men qaýymdastyqtardyń jarǵylyq shyǵystary, ulttyq qurama sportshylaryna qural-jabdyqtar men arnaıy ınventarlar satyp alý, olardy medıtsınalyq-bıologııalyq qamtamasyz etý, bedeldi týrnırler men chempıonattarǵa qatysýǵa baılanysty shyǵyndar da memleket esebinen qarjylandyrylady, delingen.
Altaıdaǵy mádenı mura - «Órteke» – CNR
Qazir Shyńjańnyń Altaı aımaǵynyń týrızmy dýmanǵa bólendi. Atap aıtqanda, Qaba aýdanynyń Aqqaba qystaǵynda qazaq karııa dombyrasyn shertip, «Órteke» oınatyp, saıahatshylardy qyzyqtyra bastady, dep habarlaıdy Qytaıdyń «Ortalyq halyq radıosy».
Qytaılyq basylymnyń dereginshe, «Órteke» óneri - Altaıdyń aımaq dárejeli materııaldyq emes mádenı murasy. «Órteke» óneriniń zańdy murageri Serik Qydyrmollauly aǵashtan jasalǵan órtekeni arada baılanǵan jip arqyly qolymen meńgerip, taǵy bir jaǵynan dombyrasyn shertip, órtekeni ústel ústinde tik turǵyzyp bıletedi. Órteke kúıge ilesip sekiredi, aınalady, keıde aýnaıdy. Bulda kórer kózge qyzyq seziledi.
«Órteke» oınatý óneri burynǵy ýaqyttarda qazaq halqy arasynda keńinen taralǵan. Ártúrli mereke-meıramdar men oıyn-toılarda kópshiliktiń kóńilin kótergen.
Alaıda, sońǵy jyldary birtindep azaıyp barady eken. Serik Qydyrmollaulynyń ákesi 70 ten artyq kúıdi shertken dombyrashy, kúıshi bolǵan. Serik te bul ónerge kende bolmaı, ákeniń ónerin jalǵastyryp keledi.